Регіянальны фестываль традыцыйнай культуры «Скарбы Гродзеншчыны» прайшоў у Свіслачы

Фестываль прайшоў у мінулую суботу ў свіслацкім гарадскім парку імя графа Тышкевіча.

Адразу пасля ўрачыстага адкрыцця свята ўдзельнікі фестывалю з усіх куткоў Гродзеншчыны прадставілі свае раёны. Ваўкавышчыну прадставіў Ваўкавыскі раённы цэнтр культуры і народнай творчасці. Народны сямейны ансамбль «Сваякi» сустрэў гасцей на падворку.

Прыемнай навіной для ваўкавычан стала тое, што зусім нядаўна Беларускі саюз майстроў народнай творчасці прыняў у свае рады майстрыху Аксану Урублеўскую. Ёй было ўручана пасведчанне.

Прапануем фота і відэарэпартаж з фэсту.

На канцэртнай пляцоўцы Ваўкавышчыну прадставіў фальклёрны калектыў «Чараўніцы» Мацвееўскага Дома культуры.

Творчая дзейнасць калектыва заснавана на выкананні двух- і трохгалосных спеваў. Прычым харавыя партыі жанчыны дзеляць абапіраючыся на сваеасаблівае светаўспрыманне, спяваюць так, як падсказвае ім адчуванне. Да спецыфікі спеваў гурта можна аднесці роўнае, спакойнае выкананне – без пад’ёмаў і  спаданняў, таму фальклорны гурт «Чараўніцы» выконвае пераважна лірычныя, бяседныя песні. У іх выкананні адчуваецца сувязь пакаленняў, як кажуць «гістарычная памяць продкаў», якая такім жа шляхам перадаецца наступным пакаленням.