У Баранавічах затрымалі падазраванага ў "мінаванні" чыгуначнага вакзалу

У аўторак у Баранавічах затрымалі падазраванага ў "мінаванні" чыгуначнага вакзалу. Яму 39 гадоў, інфармуе ў Telegram прэс-служба МУС. Паведамленне пра выбуховае прыстасаванне на вакзале паступіла ў аператыўна-дзяжурную службу мясцовай міліцыі на тэлефоне. Невядомы мужчына тэлефанаваў з таксафона. З будынка эвакуявалі 70 чалавек. Яго, а таксама прылеглую тэрыторыю, абследавалі сапёры, нічога падазронага там не знайшлі. Вакзал ужо працуе ў звычайным рэжыме.

Напярэдадні ў абласных цэнтрах нашай краіны "замінавалі" офісы БРСМ. Паведамленні пра небяспеку прыходзілі на электронную пошту.