Доўгачаканае лета — гэта перш за ўсё школьныя канікулы, аздараўленчыя лагеры, паездкі на мора. Але было і застаецца лета, праведзенае ў бабулі і дзядулі, якія жывуць у вёсцы.
Для таго, каб адпачынак і дзяцей, і сталых людзей быў бяспечным, каб папярэдзіць пажары з-за неасцярожнага абыходжання з агнём і гібелі ад іх людзей пенсійнага і пажылога ўзросту выратавальнікі Нясвіжскага РАНС да штогадовай рэспубліканскай летняй акцыі “Канікулы без дыму і агню” далучылі новую акцыю пад назвай “З клопатам аб бяспецы малой Радзімы”. Работнікі раённага аддзела па надзвычайных сітуацыях працягваюць наведваць домаўладанні ў населеных пунктах, аграсядзібах, дачах. Работу назіральных камісій дапаўняюць тэматычныя сустрэчы, гульнёва-пазнавальныя заняткі для дзяцей на дваровых тэрыторыях. Адна з іх прайшла ў суботу, 29 чэрвеня ў Нясвіжы па вуліцы Ленінскай, 183. Па ініцыятыве старшыні кааператыва тут быў арганізаваны дзіцячы гарадок з арэлямі і горкамі, выратавальнікі ў даступнай форме паўтаралі з дзецьмі і бацькамі правілы бяспекі, вясёлыя гульні праводзілі героі мультфільмаў — раставыя лялькі з Нясвіжскага Цэнтра дзіцячай творчасці.
На здымках: моманты дзіцячага света ў Нясвіжы па вуліцы Ленінскай, 183
Іна ВАСІЛЕВІЧ.