У сельгасарганізацыях раёна актыўнымі тэмпамі вядзецца нарыхтоўка кармоў для зімова-стойлавага перыяду ўтрымання грамадскага пагалоўя.
Аляксандр Сідарэнка скошвае травы
Кожную пагодную хвіліну зараз імкнуцца выкарыстаць працаўнікі ААТ “Кіраўскае райаграпрамтэхзабеспячэнне”: работа на травяных палетках не заціхае ўвесь светлавы дзень.
Толькі на невялічкі час спынілі рухавікі сваіх машын мясцовыя механізатары пазаўчора ў другой палове дня. І якраз у гэты момант на поле непадалёку ад урочышча “Пеля” і в.Вілы, дзе разгортваліся механізаваныя дзеянні па ўборцы траў, завітаў карэспандэнт “раёнкі”. Прычына прыпынку работ — вельмі ўважлівая ды і дадаючая настрою: з надышоўшай раптам хмаркі сыпануў шчодры дожджык. Яго якраз вельмі не хапала, каб “прыбіць” пыл ды і падпаіць расліны. Адразу ж паветра напоўнілася водарам, а працаўнікам прыплюсавалася бадзёрасці. Нябесная вільгаць, праўда, панавала зусім нядоўга, і вось ужо поле зноў напоўнілася гулам рухавікоў.
Валянцін Сулімскі працуе на кормаўборачным камбайне
А тут шчыраваў цэлы атрад, удзельнікі якога наладзілі сапраўдны ўборачны канвеер. Паспеўшыя травы на “Палессі” скошваў Аляксандр Сідарэнка (на фота), адразу захопліваючы 9 метраў у шырыню і пакідаючы за сабой роўныя радкі з густой травы.
Неўзабаве па гэтых радках праходзіла другая тэхніка — гэта Іван Лазаковіч на “Беларусу” з граблямі ГВП-8,5 падварушваў траву і фарміраваў пышныя валкі, у якіх пад сонцам і ветрыкам маса хутка правяльваецца. Вось тут галоўнае — не ўпусціць момант, каб яна не перасохла, бо прызначана для сенажу.
Два кормакамбайны, імкліва рухаючыся па скошанай траве, “заглытвалі” валкі, ператвараючы іх у сянажную масу. На КВК-800 на гэтым участку старанна працуе Валянцін Сулімскі, на “Ягуары” — Аляксандр Тылінскі. Яны запаўнялі прычэпы ПІМ і кузавы аўтамашын свежай зялёнай масай, якая дастаўляецца да месцаў закладкі. Задзейнічана на адвозцы адразу 7 адзінак тэхнікі: на трактарах працуюць Уладзімір Шалянгоўскі, Сяргей Чудапал, Аляксандр Выганоўскі, Дзмітрый Паладзенка, на МАЗах звозяць масу Алег Лёгкі, Валерый Араеў і Леанід Паркалаў. Хутка яны змяняюць адзін аднаго каля камбайнаў, а затым на сянажнай траншэі, дзе разгружаюцца.
Вадзіцель Алег Лёгкі заняты на адвозцы зялёнай масы
Дарэчы, першая траншэя была закладзена ў Любонічах, а ў дзень нашага прыезду завяршалася кансервацыя ямы ў Пацавай Слабадзе, і тут жа распачыналі закладку наступнай, трэцяй. Трамбоўку сянажнай масы якасна вядуць Сяргей Зазерскі і Анатоль Дзікун адпаведна на К-700 і “Амкадоры”.
Паралельна вядзецца нарыхтоўка сенажу ў палімерную ўпакоўку. Скатвае зялёную масу ў рулоны на МТЗ-1521 з дапамогай агрэгата “Тарнада” Яўген Рудак, на пагрузцы, разгрузцы і складзіраванні белых “круглякоў” заняты Аляксандр Вашукевіч.
Падварушванне травяных валкоў даручана Рыгору Булаху
Рухаючыся ў бок МТК “Пацава Слабада”, спыніліся каля другога поля, дзе завіхаліся яшчэ некалькі адзінак тэхнікі. Гэта другі міні-атрад рыхтаваў травы для далейшай іх перапрацоўкі. Дзвюма касілкамі — “Кrone” і КДН — скошвалі травы Яўген Якімчанка і Мікалай Варанчукоў. А неўзабаве травяныя валкі ўслед за імі падварушваў граблямі “Sitrex-QR 12” з 9-мятровым захопам Рыгор Булах. У хуткім часе на гэтыя валкі пераключаліся падборшчыкі.
У гушчыні палявых падзей мы сустрэліся з галоўным аграномам РАПТЗ Уладзімірам Дарафеем. Ад яго даведаліся, што ўсяго травы першым укосам мясцовым працаўнікам трэба скасіць на 1684 га, і амаль палова плана (745 га) ужо выканана. Убрана скошанае на 630 га. З планавых 13500 т сенажу нарыхтавана 4100 т, у тым ліку 330 т закансервавана ў стрэйч-плёнку.
З першага ўкосу, адзначыў тэхнолаг палёў, мяркуецца закласці не менш 5 траншэй з 9 наяўных. Зараз у іх закладваюцца травы бабова-злакавых сумесей. Нядрэнным выдаўся травастой з канюшыны, цімафееўкі, аўсяніцы, кастраца, фістулолеума. А вось люцэрна вельмі добра падыходзіць да кансервацыі ў стрэйч-плёнку. Яна ж часткова выкарыстоўваецца зараз для зялёнай падкормкі. Акрамя таго нарыхтавана 90 т сена. Па словах Уладзіміра Дарафея, пакуль усё складваецца належным чынам для таго, каб не толькі забяспечыць кароў і цялят для будучага стойлавага перыяду дастатковай колькасцю травяністых кармоў, а і зрабіць трывалы запас для іх на будучае. А калі так, то можна разлічваць у далейшым на павелічэнне прадукцыі ферм.
Аляксандр ХАХЛОЎ.
Фота аўтара.