Злодзеі адрамантавалі замок — і на гэтым папаліся

Жлобінскі райаддзел Следчага камітэта завяршыў расследаванне крымінальнай справы за крадзеж супраць двух вяскоўцаў, піша раённая газета "Новы дзень".

Доўгі час мужчыны кралі камбікорм са склада КСУП "Чырвонабярэжскі". Яны адціскалі дзверы з дапамогай аўтамабільнага дамкрата. Потым адзін з прыяцеляў залазіў ўнутр і адтуль падаваў мяхі з камбікормам. Другі прымаў іх і грузіў у машыну.

Аднак на пачатку красавіка падчас чарговай вылазкі зламалася накладка навяснога замка ў дзвярах. Зламыснікі заварылі яе з дапамогай зварачнага апарата. Але зранку кладаўшчык заўважыў гэта і паведаміў свайму кіраўніцтву. 

Аператыўнікі крымінальнага вышуку знайшлі падазраваных. Цяпер мужчынам пагражае да чатырох гадоў пазбаўлення волі.