У адным з цэхаў МТЗ адбыўся пажар (фота)

1 красавіка ў 12:08 мінскім ратавальнікам паведамілі пра загаранне ў сушыльнай камеры аднаго з цэхаў на ААТ "МТЗ" па вуліцы Даўгабродскай, 29.

Як паведамляе прэс-служба МНС, да прыбыцця ратавальнікаў цэх афарбоўкі і аздаблення трактароў быў задымлены.

Супрацоўнікі МНС выявілі, што ў цэху загарэліся змазачныя матэрыялы у вентыляцыйным корабе сушыльнай камеры на плошчы 20 квадратных метраў.

Агонь быў ліквідаваны ў 12:52. Пацярпелых пры здарэнні няма, эвакуацыя людзей не спатрэбілася. Тэхналагічны працэс прадпрыемства не спыняўся.

Мяркуецца, што прычынай пажару быў аварыйны рэжым працы рэцыркуляцйнай помпы вентылятара падачы паветра ў сушыльную камеру.