У Бярэзінскім раёне з-за старой крыўды забілі двух пенсіянераў
uvd-mo.gov.by
У Бярэзінскім раёне забілі двух пенсіянераў, мужа і жонку (1950 і 1952 гадоў нараджэння). Трагічнае здарэнне адбылося 24 лютага ў вёсцы Горуні. У адным з дамоў знайшлі трупы гаспадароў. На месца выязджала не толькі кіраўніцтва бярэзінскай міліцыі, але і абласной, а таксама кіраўнікі УСК па Мінскай вобласці.
Як інфармуе прэс-служба УУС Мінскага аблвыканкама, падазраванага ў забойстве ўжо затрымалі. Для гэтага праваахоўнікам давялося сабраць інфармацыю пра апошнія гады жыцця загінулых. Так яны і выйшлі на 37-гадовага жыхара Барысаўскага раёна, які раней жыў ў вёсцы Горуні. Сярод яго матываў — канфлікт больш чым трохгадовай даўніны. Па словах мужчыны, пад уздзеяннем алкаголю ён згадаў пра старую крыўду, што падштурхнула яго на агрэсіўныя дзеянні.
Расследаванне крымінальнай справы праводзіцца ў Цэнтральным апараце Следчага камітэта. Прызначаны судова-медыцынскія экспертызы.