Выратаваны на пажары жыхар Хоцімска вярнуўся ў кватэру, якая гарэла

Двойчы давялося ратаваць з агню жыхара Хоцімска 6 лютага, піша mogilevnews.by. 

Здарэнне адбылося 6 лютага ў двухпавярховым жылым доме на вуліцы Міра. Жыхары дома адчулі пах дыму: на першым паверсе загарэлася трохпакаёвая кватэра.
 
Пакуль ратавальнікі ехалі на выклік, суседзі выцягнулі з задымленай кватэры нецвярозага гаспадара. Але калі яны ненадоўга страцілі пільнасць, выратаваны мужчына вярнуўся ў сваю кватэру. Паўторна яго выцягнулі з жылля ўжо ратавальнікі. 

Мужчыну шпіталізавалі з дыягназам "тэрмічны апёк 2-й ступені 2% цела (правы локцевы сустаў), алкагольнае ап'яненне".
 
Агонь пашкодзіў маёмасць у пакоі, ад яго закураныя сцены і столь. Паводле папярэдніх звестак, прычынай пажару стала паленне ў ложку.