Творческий взгляд на безопасность. В Ушачах подвели итоги конкурса «Спасатели глазами детей»
Не адзін дзень майстраваў пажарную машыну шасцікласнік Косця Лабёнак, старанна вырабляла кожную дэталь, заклікаючы берагчы лес ад пажару, першакласніца Маша Рубіс, правілы бяспечнага адпачынку ў аквапарку склала ў цікавае апавяданне Саша Стрыжонак. Больш двух дзясяткаў гадоў творчы конкурс “Выратавальнікі вачыма дзяцей” захоплівае дзяцей розных узростаў.
Сёлета юныя канструктары і мастакі, пісьменнікі і паэты прадставілі на яго больш за паўсотні работ, прысвечаных бяспечным паводзінам дома, на вадзе, на прыродзе, падчас гульняў. 
Як адзначыў інспектар інспекцыі нагляду і прафілактыкі Ушацкага РАНС В.Карэйша, выявіць самых лепшых, як заўсёды, няпроста. Перш за ўсё ўлічваліся арыгінальнасць ідэі, паўната раскрыцця тэмы, мастацкае афармленне, акуратнасць. Так, у намінацыі “Малюнак” лепшымі прызнаны работы Яніны Лабёнак з Арэхаўскай школы, Валерыі Стуканавай і Дар’і Броўка з Ушацкай. Самыя яскравыя плакаты атрымаліся ў Варвары Сіняковай з Ільюшынскай школы, Анастасіі Кавалеўскай і Яны Лабэцкай з Вялікадолецкай. Праявілі фантазію ў стварэнні вырабаў Дар’я Антопуш з Арэхаўскай, Дамініка Лапіцкая з Вялікадолецкай і Марыя Рубіс з Глыбачанскай школ, выдатныя паэтычныя здольнасці праявілі Ілья Юргевіч з Глыбачанскай, Злата Клачок з Ушацкай і Антон Ардынскі з Вялікадолецкай. Аўтарамі лепшых апавяданняў сталі Ангеліна Міцкевіч з Ушацкай, вучаніцы Арэхаўскай школы Аляксандра Стрыжонак і Вікторыя Калітуха. У намінацыі “Мадэль” вылучана спецмашына Канстанціна Лабёнка з Ільюшынскай школы, а сярод “Скульптур малых форм” – агняборца Ксеніі Церашкавец з Глыбачанскай.
Работы пераможцаў раённага этапу адпраўлены ў Віцебск для ўдзелу ў адпаведным абласным конкурсе.
Вольга КАМАРКОВА.