Пад Віцебскам легкавік збіў лася, пацярпела пасажырка машыны

Пад Віцебскам легкавік збіў лася, у выніку здарэння пацярпела пасажырка аўто. Як паведамляе Віцебская ДАІ ў сваёй суполцы Вконтакте, інцыдэнт адбыўся ўвечары 11 студзеня каля аргагарадка Кіраўская.

Аўтамабіль “Рэно Лагуна” рухаўся па трасе Віцебск-Полацк, калі на дарозе раптам з’явіўся лось. Кіроўца не паспеў зрэагаваць і сысці ад сутыкнення.

Жывёла загінула. 33-гадовая пасажырка “Рэно” атрымала траўмы галавы і пералом шыйнага аддзелу пазваночніка. Пацярпелую даставілі ў лякарню.

ДАІ рэкамендуе звяртаць увагу на знакі “Дзікія жывёлы”, усталяваныя пры дарозе, скідваць хуткасць, праязджаючы лясныя масівы, і быць гранічна пільнымі.