Падарункі напярэдадні навагодніх святаў атрымалі маладыя матулі, якія летась нарадзілі сваіх першынцаў.
Сустрэча з матулямі і бабулямі нованароджаных адбылася ў будынку аддзела загс райвыканкама ў рамках акцыі “У Новы год з новым пакаленнем” па ініцыятыве раённай арганізацыі РГА “Белая Русь”.
Адкрываючы ўшанаванне намеснік старшыні райвыканкама, старшыня раённых арганізацый “Белай Русі” і “Беларускага сазюза жанчын” Зоя Фаміна адзначыла, што традыцыю віншаваня маладых маці вырашылі пашырыць, і сёлета запрасілі на мерапрыемства таленавітых маладых людзей.
Расціць дзяцей, марыць, ствараць, вучыцца, быць шчаслівымі мы можам таму, што жывём пад мірным небам. Мір у нашай краіне захоўваецца дзякуючы стваральнай, канструктыўнай палітыцы, якую праводзіць наша дзяржава і Прэзідэнт, падкрэсліла прадстаўнік раённай улады.
Матчына праца – праца складаная і адказная, бо ў руках маці будучыня нашага народа. Зоя Фаміна пажадала маладым матулям, каб іх дзеці радавалі не толькі сваіх родных, але і ўсіх людзей. Яна выказала спадзяванне, што ў сем’ях, дзе нарадзіліся першынцы, з’явяцца яшчэ дзеці, таму што дзеці — гэта самае вялікае шчасце. Павіншавала матуль з першым дзіцём і Новым годам і начальнік загса Ірына Мілеўская.
Маладым маці і бабулям, якія прыйшлі на сустрэчу замест дачок, што ў гэты час займаліся сваімі немаўлятамі, уручылі падарункі. Атрымала падарунак і Кацярына Парфір’еўна Казакова, адзіная прабабуля, што прысутнічала на свяце.
Са словамі ўдзячнасці ад віноўніц урачыстасці выступіла Марыя Шыбека, якую сенненцы яшчэ не паспелі забыць, як актыўную ўдзельніцу і пераможцу раённых і абласных творчых конкурсаў.
З перамогай на абласным этапе конкурсу “Залатое пяро “Белай Русі” – 2018” павіншавалі вучаніцу 11 класа Машканскай ДССШ Алёну Валодзькіну, якая заняла трэцяе месца ў намінацыі мастацкай фатаграфіі пра сямейны адпачынак і турызм у Беларусі “Вместе весело шагать”.
У канцы верасня раённая арганізацыя ГА “Беларускі саюз жанчын”, раённая газета “Голас Сенненшчыны” і аддзел па адукацыі райвыканкама аб’явілі сярод школьнікаў конкурс на лепшае сачыненне пра маці “Мілая мама мая!”. Дзецям прапанавалі публічна прызнацца ў любві да самага блізкага чалавека, які даў ім не толькі жыццё. У рэдакцыю прыйшло шмат пісем, лепшыя з якіх былі апублікаваны.
На мерапрыемстве былі ўзнагароджаны пераможцы конкурсу: у намінацыі “Проза” адзінаццацікласніца Машканскай школы Карына Шалуха, у намінацыі “Паэзія” вучань 9 класа Яноўскай школы Дзмітрый Мірановіч. Школьнікі прачыталі свае творы для прысутных.
Прыйшлі на сустрэчу і Дзед Мароз са Снягурачкай, якія павіншавалі ўсіх цукеркамі. А артысты Сенненскага РЦКНТ парадавалі добрымі песнямі.
Таццяна Буракова.