2018 год азнаменаваўся для нашага земляка, ураджэнца вёскі Асмолава, жыхара ўкраінскага Харкава Міхаіла Плакса і яго сябра і паплечніка Віктара Клімянкова чарговай падзеяй у напісанні гісторыі роднага краю. Свет убачыла другая кніга трылогіі “Асмолава. Старонкі гісторыі” — “Наша жыццё”. Дакладней, выйшла першая частка другой кнігі.
У ёй расказваецца пра кіраўнікоў Нясвіжскага раёна, Ланскага сельсавета, калгасаў “Кастрычнік”, “Ленінскі шлях”, імя Леніна і ААТ “Лань-Нясвіж”, Ланскай СШ, праца якіх у пэўнай ступені ўплывала на развіццё вёскі Асмолава, на жыццё яе жыхароў. Апавядаецца таксама пра дырэктараў Нясвіжскага дома-інтэрната для састарэлых і інвалідаў, які знаходзіцца ў в. Асмолава, пра настаўнікаў Асмолаўскай пачатковай школы (яна працавала з 1939 па 1976 гады).
Наступны раздзел кнігі расказвае аб працаўніках сельскай гаспадаркі, жыхарах гэтай вёскі: брыгадзірах паляводчых брыгад, звеннявых паляводчых звенняў, загадчыках малочнатаварнай фермы “Асмолава”, даярках, цялятніцах, вадзіцелях, механізатарах, калгасніках, якія працавалі на конных жняярках, камбайнерах, членах будаўнічай брыгады калгаса, кавалях, кладаўшчыках, конюхах. Ёсць аповед і пра паштальёнаў, што абслугоўвалі гэту вёску.
У Асмолаве жыло і жыве шмат выдатных працаўнікоў. Многія ў свой час былі ўзнагароджаны ордэнамі і медалямі за самаадданасць, вернасць роднаму полю і сваёй справе. Так, рупнасць даяркі Надзеі Канстанцінаўны Плакса адзначана ордэнамі Працоўнага Чырвонага Сцяга і “Знак Пашаны”. Палявод Ганна Піліпаўна Лютко (Дзецкая) была ўзнагароджана ордэнам Працоўнага Чырвонага Сцяга. Палявод Зоя Сцяпанаўна Плакса (Жук) — ордэнам “Знак Пашаны”. Брыгадзір паляводчай брыгады Міхаіл Юльянавіч Плакса — ордэнамі Кастрычніцкай Рэвалюцыі і “Знак Пашаны”. Механізатар Міхаіл Міхайлавіч Плакса і вадзіцель Леанід Міхайлавіч Сайкевіч — ордэнамі Працоўнай Славы ІІІ ступені. Механізатар Сямён Міхайлавіч Дзецкі — ордэнам Працоўнага Чырвонага Сцяга.
М.Ю. Плакса
Н.К. Плакса
М.М. Плакса
У кнізе размешчана 300 партрэтных здымкаў яе герояў, шмат пейзажных фота, у тым ліку рэк Ушы і Лані, што працякаюць за ваколіцай вёскі.
Наперадзе чытача чакае сустрэча з другой часткай кнігі “Наша жыццё”. Аўтары раскажуць пра дасягненні асмолаўцаў, пра развіццё культуры на вёсцы, пра адпачынак сяльчан. Не сумняюся, што гэта будзе таксама цікавы і павучальны аповед.
Дарога да роднай ваколіцы
Тамара ПРАЛЬ-ГУЛЬ.
Фота з кнігі “Асмолава.
Старонкі гісторыі”.