Расце колькасць пацярпелых ад петардаў у навагоднюю ноч
Фота: pixabay.com
Расце колькасць пацярпелых ад петардаў у навагоднюю ноч. Міліцыя распавяла пра здарэнні ў Гомельскай і Гродзенскай абласцях.
У Мазыры петарда разарвалася ў левай руцэ 48-гадовага мужчыны, былі пашкоджаныя два пальцы. Меддапамогу яму аказвалі ў гарадской бальніцы. Пацярпелы быў у стане алкагольнага ап'янення. Падобнае здарэнне адбылося ў Рэчыцы, дзе пацярпела 29-гадовая жанчына. У яе хімічны апёк правага вока. Яна таксама была ў стане алкагольнага ап'янення. Агулам у Гомельскай вобласці пацярпелі 4 чалавекі.
Два здарэнні з піратэхнікай зафіксаваныя на Гродзеншчыне. У Смаргоні ў бальніцу з сур'ёзнай траўмай рукі трапіў 37-гадовы мінчук, а ў Слоніме апёкі твару атрымала 32-гадовая мясцовая жыхарка. Шпіталізацыя ёй не спатрэбілася.
Праваахоўнікі падкрэсліваюць, што гэтыя выпадкі адбыліся па-за месцамі правядзення масавых мерапрыемстваў. Таксама як і здарэнні ў Барысаве і Салігорску, дзе пацярпелі дзеці.