Рабочая група сустрэлася з работнікамі Смаргонскага ліцейна-механічнага завода

Акрамя тэм, прапанаваных на абмеркаванне, прысутныя задалі ўдзельнікам інфармацыйнай групы пытанні, якія найбольш іх хвалююць. Шмат нараканняў і пажаданняў было выказана ў бок камунальных службаў. Снегапад зімой – звычайная справа, аднак жыхарам горада хацелася б хадзіць па расчышчаных тратуарах. Такая магчымасць у людзей ёсць не заўсёды. Прагучала просьба пачысціць рэчку ў гарадскім парку, асабліва каля амфітэатра, дзе часта ладзяцца канцэрты.

Жыхары дома №9 па вуліцы Заходняй паскардзіліся на тое, што каля іх дома рамантавалі падземныя камунікацыі і тратуары так і засталіся разабранымі.

Не задаволены жыхары горада і вялікім кантэйнерам для смецця ля дома, што будуецца па вуліцы Гагарына. Часта ён перапоўнены, а смецце раскідана. Гэтыя пытанні абяцала ўзяць на асабісты кантроль начальнік аддзела ЖКГ райвыканкама Алена Атцэцкая.

Многа пытанняў выклікае ў гараджан праспект Індустрыяльны, работы на якім працягваюцца. Намеснік начальніка РАУС Анатоль Шчасны запэўніў, што хутка на праспекце ўстановяць ліхтары, якія працуюць на сонечных батарэях. Адказаў ён і на пытанне, чаму па Індустрыяльнаму перыядычна занавешваюцца адныя знакі і з’яўляюцца іншыя. Калі там праводзяцца рамонтныя работы, хуткасць абмяжоўваецца да 40 км/г, калі не – да 70.

Віялета ВОЙТКА.

Фота аўтара.