Унавацыйная пляцоўка па рэалізацыі маладзежнай палітыкі прайшла ў Хоцімску

Кожны помніць той перыяд жыцця, калі вырываўся з-пад цёплага і ўтульнага крыла бацькоў і адпраўляўся ў вольнае плаванне. Маладосць — гэта час вялікіх планаў на будучыню і пачатак усіх перспектыў. Калі малады, то здаецца няма нічога немагчымага: варта толькі пачаць, і ўсё атрымаецца! Гэта час, калі можна рабіць усё, што хочацца, не задумваючыся пра выдаткаваны час.Цікава, аб чым мараць і якую грамадзянскую пазіцыю маюць маладыя і перспектыўныя хацімчане? Менавіта гэтыя пытанні абмяркоўваліся ў час работы інавацыйнай пляцоўкі з удзелам Таццяны Меншыкавай, намесніка начальніка ўпраўлення па працы са СМІ і маладзёжнай палітыкі галоўнага ўпраўлення ідэалагічнай работы, культуры і па справах моладзі аблвыканкама.
Галоўным здабыткам і багаццем хоцімскай зямлі заўжды былі людзі, якія сваёй працай, талентам, сваёй шчырасцю і дабрынёй праслаўлялі наш чароўны край. Асаблівую ўвагу варта спыніць на моладзі. Маладое пакаленне Хоцімшчыны — гэта ўпэўненыя ў сабе, цікавыя, неардынарныя, таленавітыя, крэатыўныя людзі.
У ток-шоу на тэму “Мая грамадзянская пазіцыя” прынялі ўдзел не толькі вопытныя спікеры — Мікалай Хучаў, намеснік старшыні Хоцімскага райвыканкама, Дзмітрый Лутчанкоў, начальнік аддзела арганізацыйна-кадравай работы, Алена Раманенка, начальнік аддзела ідэалагічнай работы і па справах моладзі Краснапольскага райвыканкама, але і пачынаючыя і даволі перспектыўныя маладыя людзі прыбесядскага краю — Юрый Пахомаў, настаўнік, дызайнер адзення, і Вольга Рэусава, «Маладая гаспадыня Магілёўскай вобласці — 2018».
Вядома, што моладзь заўжды адлюстроўвала інтарэсы таго часу, у які жыла. Напрыклад, сучаснае маладое пакаленне проста немагчыма ўявіць без разнастайных гаджэтаў. Але замест таго, каб суткамі напралет бязмэтна сядзець у Сеціве, адтуль можна ўзяць і нямала карыснага. З гэтым пагадзіўся і “будучы Юдашкін”, так назвалі госці Юру Пахомава. Малады дызайнер прызнаўся, што актыўна карыстаецца сацыяльнымі сеткамі. Напрыклад, у дадзены момант ідзе актыўнае стварэнне ўласнага сайта. У сваім узросце Юра ўжо на сур’ёзным узроўні займаецца дызайнам адзення, музыкай, фота і анімацыяй. Але на гэтым ён не спыняецца і працягвае адшукваць для сябе нешта новае, цікавае. На гэты конт яго пазіцыя — знойдзе сябе той, хто жыве ў няспынным пошуку.
Актыўную грамадзянскую пазіцыю падтрымлівае Вольга Рэусава. Дзяўчына прызналася, што, нягледзячы на баявы характар, долю хвалявання на абласным конкурсе ўсё ж адчувала. Прадстаўляць цэлы раён — гэта вам не жарт. Але аказаны давер усё ж апраўдала, і стала пераможцай.
Размова ў цэнтральнай бібліятэцы праходзіла ў фармаце адкрытага дыялогу, кожны мог задаць свае пытанні і атрымаць змястоўны на іх адказ. Нямала цёплых і шчырых слоў у сяброўскай цеплай атмасферы было сказана аб малой радзіме.
— Якія цудоўныя і шчырыя маладыя людзі жывуць на хоцімскай зямлі, сапраўдныя беларусы. Бярыце ад жыцця ўсё, што магчыма і ідзіце толькі наперад, — параіла Таццяна Меншыкава.
Адным з ключавых момантаў работы інавацыйнай пляцоўкі з’яўляецца міжнароднае супрацоўніцтва. Штогод на тэрыторыі Хоцімшчыны і суседніх раенаў Расійскай Федэрацыі праходзяць сумесныя мерапрыемствы, спаборніцтвы, алімпіяды.
Падчас наведвання Суражскага педагагічнага каледжа імя А.С. Пушкіна, беларуская дэлегацыя атрымала сапраўдны зарад бадзерасці і аптымізму. У рамках агляднай экскурсіі беларусы наведалі спартыўную залу, аўдыторыі каледжа, а таксама прынялі ўдзел у занятку валанцёраў «Новакемп». Гульнёвыя сітуацыі, якія прапанавалі валанцёры, адразу накрылі беларускіх гасцей хваляй пазітыву і дабра. Таксама была падрыхтавана канцэртная праграма з удзелам ансамбля барабаншчыц і лыжачнікаў.
З адказным словам выступіла Таццяна Меншыкава, якая адзначыла неабходнасць і важнасць супрацоўніцтва суседніх дзяржаў, якія ва ўсе часы былі поруч. Начальнік аддзела ідэалагічнай работы, культуры і па справах моладзі Хоцімскага райвыканкама Аляксандр Цішчанка падарыў на памяць аб сустрэчы кнігу пра памятныя мясціны беларускай зямлі.
Пасля за «круглым сталом» беларусы і расіяне абмяняліся вопытам работы. Ад беларускай дэлегацыі выступіла настаўнік СШ №2 Вольга Летнікава з прэзентацыяй працы «Наша здароўе — у нашых руках», адзначыўшы падчас выступлення, што яе выпускнікі таксама з’яўляюцца навучэнцамі Суражскага педагагічнага каледжа.
— Калі мы разам, мы — адзіныя. Межы нашага горада заўжды адкрыты для беларусаў, і мы заўжды рады бачыць нашых суседзяў у гасцях, — адзначыла напрыканцы дырэктар каледжа Іна Шпакава.
Пасля цікавай экскурсіі за мяжу, дэлегацыя ідэолагаў зноў вярнулася на хоцімскую зямлю і наведала Іваноўскі СДК. Завяршэнне дня атрымалася з сапраўдным аншлагам. Увазе гасцей была прапанавана імпрэза з трох мясцовых абрадаў. У канцы прадстаўлення прысутныя апладзіравалі стоячы. Асаблівыя словы ўдзячнасці прагучалі ў адрас народнага фальклорнага ансамбля “Вербіца”.
Дзень атрымаўся насычаны, не менш цікавым атрымаўся вечар, які скончыўся спартыўнымі эстафетамі. У цэлым госці выказалі станоўчыя эмоцыі, высока ацанілі работу па адраджэнні мясцовых традыцый і народных абрадаў, а таксама былі прыемна здзіўлены ад зносін з маладымі кадрамі хоцімскай зямлі.
— Хоцімшчына адрозніваецца сваёй непадобнасцю, шчырасцю, цеплынёй, аутэнтычнасцю. Шануйце гэта, зберагайце і перадавайце наступным пакаленням. Тое, што ў вас маецца — гэта і ёсць сапраўдны скарб, — такія словы прагучалі падчас сустрэчы.

Вольга Зайцава