Аператыўны канал: інфармацыя Смаргонскага раённага аддзела Следчага камітэта

*      *       *

Жывучы ў Астраўцы, не ўсочыш за тым, што адбываецца ў смаргонскіх Кавалях. А ў гэтай вёсцы ў жыхаркі суседняга райцэнтра знаходзіцца сядзіба. І нехта паклаў на яе вока, пасля чаго з гаспадарчых пабудоў і лазні зніклі газавы балон, посуд, металалом, саломарэзка, дэталі рухавіка мотаблока.

*      *       *

Узбуджана крымінальная справа супраць смаргонца за незаконнае паляванне, падчас якога была застрэлена казуля непадалёку ад вёскі Мікулеўшчына.

А справа была так: паляўнічыя на законных падставах падстрэлілі казулю, аформілі неабходныя ў такіх выпадках дакументы. Крыху пазней паляўнічы падстрэліў яшчэ адну казулю, але ўжо не ў рамках законнага палявання. Потым мужчына папрасіў двух мясцовых жыхароў, каб дапамаглі яму вывезці і разабраць жывёліну.

Браканьерства выявілі работнікі прыродаахоўнай інспекцыі.

*      *       *

Жыхар вёскі Наваспаск прычыніў пранікальнае раненне жыхару Смаргоні. Прычына інцыдэнту - непрыязныя адносіны. 

*      *       *

Узбуджана крымінальная справа за транспарціроўку казулі. Аўтамашына збіла яе на дарозе, а жыхар нашага раёна спыніўся, закінуў тушу ў багажнік і павёз дамоў.

*      *       *

У вёсцы Васілевічы злачынца адціснуў дзвярны прабой, залез у гаспадарчую пабудову, якая належыць жыхару Смаргоні, і ўкраў адтуль бензапілу, гаечныя ключы, садовыя нажніцы, іншы інструмент.

На наступны дзень было ўстаноўлена, што крадзеж учыніў раней неаднаразова судзімы жыхар вёскі Наваспаск. Яго затрымалі і змясцілі ў ізалятар часовага ўтрымання райаддзела міліцыі.

*      *       *

Бацька разам з сынамі школьнага ўзросту, якія жывуць у аграгарадку Асінаўшчызна, наведаліся ў вёску Мацюляны, дзе з падворка дачнага дома, што належыць жыхарцы Мінска, укралі стальны бытавы лом.

*      *       *

Узбуджана крымінальная справа за пагрозу забойствам. Знаходзячыся на здымнай кватэры, мужчына махаў нажом і выказваў пагрозы забойствам сваёй сужыцельцы і яе непаўналетняму сыну.

Інфармацыю раённага аддзела  Следчага камітэта падрыхтаваў да друку Юрый ЯНУШКЕВІЧ.

Фотаздымак выкарыстаны ў якасці ілюстрацыі.