Неяк у разгар засухі пацікавілася ў галоўнага агранома ААТ “Нясвіжскія Астроўкі” Аляксея Гроха, як адчуваюць сябе пасевы. “Плакаць хочацца, гледзячы на іх”, — не хаваў трывогі Аляксей Яраслававіч. Так, збожжавыя на сонцы, без дажджу, “падгарэлі”, не паспеўшы як след наліцца. У выніку валавы збор зерня ў гаспадарцы склаў сёлета 5412 тон. У параўнанні з леташнім недабралі трэцюю частку. Ураджайнасць склала 40,3 ц/га. Ніжэй, чым магла б быць, чым запраграмавалі яе, унёсшы аптымальныя дозы ўгнаенняў, падрыхтаваўшы як трэба глебу, пасеяўшы ў тэрмін, апрацаваўшы пасевы ад пустазелля і хвароб. Па ўраджайнасці ААТ “Нясвіж-скія Астроўкі” займае пятае месца ў раёне.
На пытанне, ці будуць ладзіць сёлета дажынкі, дырэктар адкрытага акцыянернага таварыства Васіль Халопіца адказаў:
— Будзем. Не варта традыцыі парушаць. Людзі працавалі, шчыравалі. Трэба ім “дзякуй” сказаць.
Дажынкі прайшлі ў адну з субот жніўня, у форме “агеньчыка”. На свята да хлебаробаў прыехаў намеснік старшыні райвыканкама Міхаіл Афанасік. Ён сардэчна павіншаваў вяскоўцаў з заканчэннем такой адказнай кампаніі, як жніво, пажадаў поспехаў і ўручыў узнагароды. Падзячныя пісьмы старшыні Нясвіж-скага райвыканкама атрымалі аператар збожжасушыльнага комплексу Андрэй Аляшкевіч, які ў іншы час года працуе ў гаспадарцы вадзіцелем, і механізатар Мікалай Кішко, які падчас жніва прасаваў салому (на фота 1 яны (злева направа) — з кіраўніком гаспадаркі Васілём Халопіцам).
Фота 1
Дырэктар сельгаспрадпрыемства Васіль Халопіца падвёў вынікі жніва-2018. Уручыў лепшым працаўнікам збожжавай нівы Ганаровыя граматы акцыянернага таварыства — за 1 і 2 месцы, Падзякі — за 3 месца. І, зразумела, грашовыя прэміі.
Першае месца сярод старшых камбайнераў заняў Аляксандр Сукала (на фота 2 — злева). Ён на камбайне “Мега-360” убраў 264 га, намалаціў 1026,4 тоны збожжа. На другім месцы — Уладзімір Шыманскі (248 га, 1012 тон) (на фота 3 — злева). Трэцім прызёрам стаў Яўген Ватазін (208 га, 824 т).
Сярод вадзіцеляў у лідары выйшаў Міхаіл Чыркун. На аўтамашыне ГАЗ-САЗ-3507 ён даставіў з поля на ток 675 тон збожжа. Закончыўшы справу ў сваёй гаспадарцы, М. Чыркун дапамагаў на жніве ў Валожынскім раёне. Перавёз там яшчэ 234 тоны. Дарэчы, падчас дажынак у роднай гаспадарцы ён яшчэ працаваў на Валожыншчыне. На другім месцы — вадзіцель МАЗа Віталь Куган, які перавёз 672,4 тоны (на фота 2 — справа). На трэцім — Віталь Пашкевіч (644 тоны) (на фота 3 — справа).
Фота 2
Фота 3
На свяце прысутнічаў таксама старшыня РК прафсаюза работ-нікаў АПК Іван Кендыш. Ён уручыў падарункі маладому вадзіцелю Сяргею Малышку, які першы год быў задзейнічаны на адвозцы збожжа ад камбайнаў, і іншым працаўнікам, якія сёлета ўпершыню ўдзельнічалі ў жніве: камбайнерам Сяргею Куневічу і Кірылу Хурсевічу, загадчыцы збожжавага тока Аксане Чыркун.
Для хлебаробаў цудоўны канцэрт падрыхтавалі работнікі Астроўскага сельскага дома культуры і іх актыўныя памочнікі, энтузіясты, аматары сцэны, людзі творчыя, з запалам.
— Вельмі спадабаўся канцэрт, — кажа старшыня прафкама гаспадаркі Кацярына Шукайла. — Нашы артысты — такія малайцы.
Прыемна паслухаць добрую песню, закончыўшы цяжкую працу. Яна — для сэрца, для душы, напаўняе радасцю, узнёсласцю, кліча на новыя здзяйсненні.
Тамара ПРАЛЬ-ГУЛЬ.
Фота Андрэя
АЛЯШКЕВІЧА.