Убрана – 782 га
Намалочана – 2258 тон
Ураджайнасць – 28,9 ц/га
Сямігадовы Дзмітрый спяшаецца на поле. Ён ведае, дзе сёння ходзіць бацькаў камбайн. Як ведае і тое, што бацька дасць паруліць. А ў хлопца будзе моцна біцца сэрца ад радасці і шчасця, што ён кіруе гэтай вялізнай машынай.
Так кожнае лета для Дзмітрыя азначала не толькі час школьных канікулаў, а і магчымасць зноў паруліць, сядзець цэлы дзень поруч з бацькам і назіраць, як жняярка паглынае калоссе, а потым залацістыя зярняты адпраўляюцца з бункера на грузавую машыну. І не пужалі ні спёка ў кабіне камбайна, ні пыл, ні стома.
Руслан, будучы яшчэ школьнікам, пайшоў памочнікам камбайнера, хаця згодна з заканадаўствам гэтага рабіць было нельга. Тады ён працаваў з бацькам, а работу пісалі на дзеда. Так пачаўся яго шлях камбайнера. І вось пасля заканчэння школы мінуў 21 год, а лета для яго — заўжды жніво.
Бацька Дзмітрыя і Руслана – Рыгор Бойка – сем гадоў ужо на пенсіі, але яшчэ працуе ў гаспадарцы на пагрузчыку. Гэта ён сваёй работай, сваім прыкладам не толькі навучыў сыноў цяжкай працы хлебароба, а і прывіў ім працавітасць і стараннасць. Браты з году ў год складаюць свой сямейны экіпаж у КСУП “Прыгарынскі-2012”. Руслан – старшы камбайнер, а Дзмітрый – памочнік.
– Уборка гэтага года пачалася рана ды і прабегла зусім непрыкметна – у рабоце, клопатах. Час ад часу я садзіўся за руль свайго трактара, калі патрэбна было выконваць нейкія іншыя справы ў гаспадарцы. Тады Руслан заставаўся за рулём камбайна сам, – расказвае Дзмітрый.
З Дзмітрыем мы сустрэліся на полі, дзе ён сеяў рапс. Трактар замацаваны за Дзмітрыем. І ён практычна сам вядзе ўсю пасяўную кампанію ў гаспадарцы. Гэта і сяўба культур, і ворыва, і сенакос. Руслан жа прыходзіць у гаспадарку толькі на час жніва.
Некалі, у пачатку свайго працоўнага стажу, Руслан і Дзмітрый працавалі на “Доне”. Зараз ужо дзевяць сезонаў – на КЗС-10. Канешне, у параўнанні з тэхнікай, на якой даводзілася ўбіраць як у школьныя гады, так і ў пачатку працоўнай дзейнасці ў гаспадарцы, зараз камбайн намнога лепшы.
Пра сёлетнюю ўборачную гавораць, што асаблівых праблем не было. Хаця, канешне, дажджы ўносілі свае карэктывы і стваралі складанасці. Але з году ў год прырода мяняе планы чалавека, таму значных праблем у гэтым не бачаць.
На ўборцы камбайн Бойкаў не падводзіў. Было некалькі дробных рамонтаў, якія нават у разлік не бяруцца. Запчасткі падвозілі хутка, таму камбайн зноў ішоў у поле. У гэтым заслуга ў першую чаргу саміх хлопцаў, якія даглядаюць сваю тэхніку, стараюцца ўсё падрыхтаваць своечасова. Для іх важна пачаць сезон ды і кожны рабочы дзень з максімальнай падрыхтоўкай, каб якасна выканаць работу.
Таццяна СЕГЕН
Фота аўтара