Кобрынскія актывісты БРСМ на чале з першым сакратаром РК ГА “БРСМ” Марынай Паляводай наведалі радзільны дом, дзе павіншавалі шэсць маладых мам, дзеці якіх нарадзіліся напярэдадні Дня Незалежнасці Рэспублікі Беларусь.
Маленькія, з ружовымі шчочкамі, жыхары Кобрыншчыны ціхенька сапяць кірпатымі носікамі ў сваіх калысках. Зараз іх задача – добра есці, моцна спаць і радаваць бацькоў. Але хто ведае, можа праз дзясяткі гадоў менавіта гэтыя сведкі дзяржаўнага свята праславяць нашу радзіму далёка за яе межамі. А нагадваць аб роднай зямлі і аб тым, што іх нараджэнне прыйшлося на святочную дату, будзе першая ў жыцці распашонка-вышыванка.
– Нашы продкі верылі ў моц вышытага на адзенні арнаменту, – тлумачыць такі незвычайны падарунак Марына Палявода. – Таму спадзяюся, што распашонкі стануць для немаўлятак сапраўдным абярэгам.
Матулям таксама ўручылі падарункі – кубачкі з арнаментам і кветкі. Белыя ружы як сімвал чысціні і дабрыні прынеслі ў палаты святочны і радасны настрой.
Ксенія ПАЛЬТО.
НА ЗДЫМКУ аўтара: актывісты БРСМ віншуюць жанчын.