У Мінску падпалілі тры машыны, а побач раскідалі курыныя тушкі
Фота: sk.gov.by
У Мінску на вуліцы Амельянюка сёння раніцай падпалілі адразу тры машыны — пажарныя хутка ліквідавалі ўзгаранне, аднак заўважылі дзіўныя прадметы, раскіданыя побач з месцам здарэння. Туды выклікалі следчых.
Як піша TUT.by са спасылкай на відавочцаў, ля падпаленых машын былі раскіданыя курыныя тушкі, свіныя вушы і языкі, паперкі ў выглядзе доларавых купюр, а таксама разлітая чырвоная фарба. Таксама там знайшлі прадметы, падобныя да гільзаў.
Следчы камітэт ужо распачаў крымінальную справу па факце падпалу. Пад трыма аўтамабілямі знайшлі каністры з гаручай вадкасцю. Таксама каністра была пад чацвёртым аўтамабілем, які не загарэўся. Вінаватым у гэтым падпале пагражае да 12 гадоў турмы. Цяпер шукаюць падазраваных.
Фота: Следчы камітэт, відавочцы здарэння