2 ліпеня шаркаўчане адсвяткавалі 515-годдзе роднага гарадскога пасёлка

2 ліпеня ў 515 раз Шаркаўшчына адзначыла дзень нараджэння — юбілей прыгожы і яркі, доўгачаканы. Ён надоўга застанецца ў памяці жыхароў і гасцей шаркаўшчынскага краю. Нягледзячы на дождж, святочныя мерапрыемствы працягваліся з ранку і да позняга вечара, і так альбо інакш кожны з прысутных адчуў сваё дачыненне да юбілейных падзей. Асабліва самі шаркаўчане, лёс якіх неразрыўна звязаны з гісторыяй нашага краю, таму і свята мясцовыя жыхары ўспрымалі як уласнае, асабістае. На плошчы каля райвыканкама ў адзінаццаць гадзін сабралася вялікая колькасць людзей, каб раздзяліць са сваімі землякамі радасць цудоўнай падзеі — доўгачаканага юбілею — 515-годдзя гарадскога пасёлка Шаркаўшчына.

Адметны юбілей у мінулы панядзелак праходзіў напярэдадні Дня Незалежнасці Рэспублікі Беларусь і ў гонар дня вызвалення раёна ад нямецка-фашысцкіх захопнікаў. Таму і заканамерным пачаткам усіх святочных падзей стаў урачысты мітынг каля помніка загінуўшым воінам на плошчы перад райвыканкамам. Прадстаўнікі раённай улады, працоўных калектываў і навучальных устаноў, ветэраны вайны і працы, дэлегацыі замежных гасцей і нашых суседзяў з іншых рэгіёнаў, усе, хто прысутнічаў на мерапрыемстве, ушанавалі памяць ахвяр фашызму хвілінай маўчання, усклалі да абеліска вянкі і кветкі. А потым урачыстым шэсцем накіраваліся да раённага Цэнтра культуры, куды ў сувязі з дажджом былі перанесены ўсе асноўныя мерапрыемствы святочнай праграмы.

Сярод іх — ушанаванне працаўнікоў сяла, уручэнне ўзнагарод перадавікам аграпрамысловага комплексу раёна, якія дасягнулі высокіх працоўных вынікаў падчас правядзення вясенняй пасяўной. Узнагароды лепшым аграрыям раёна ўручыў старшыня Шаркаўшчынскага райвыканкама Дзмітрый Міхайлавіч Ламака. Падчас свайго выступлення кіраўнік раёна адзначыў, што гісторыю Шаркаўшчыны на працягу ўсіх 515-ці год стваралі яе жыхары. Усе яны звязалі свой лёс з шаркаўшчынскім краем, нарадзіліся і выраслі на гэтай зямлі, самааддана працавалі на ёй раней і працягваюць працаваць, памнажаючы дабрабыт раёна. Шчырыя словы ўдзячнасці былі адрасаваны ветэранам вайны і працы.

— Наша Шаркаўшчына, нягледзячы на пражытыя стагоддзі, усё такая ж маладая, накіраваная ў будучыню, — адзначыў падчас свайго выступленя Дзмітрый Міхайлавіч. — Жадаю гарадскому пасёлку і ўсім яго жыхарам далейшага росквіту, цікавых інвестыцыйных праектаў, новых вытворчасцяў і росту дабрабыту насельніцтва.

Словы падзякі старшыня райвыканкама адрасаваў і сваім папярэднікам, былым кіраўнікам раёна, якія прысутнічалі на ўрачыстасці і шмат зрабілі дзеля дабрабыту шаркаўшчынскай зямлі і яе жыхароў. На сцэну былі запрошаны былыя кіраўнікі Шаркаўшчынскага раёна Віктар Андрэевіч Бядрыцкі і Мечыслаў Віктаравіч Морхат, якія таксама павіншавалі шаркаўчан з адметнай датай у жыцці нашага рэгіёну, які ў іх жыцці назаўсёды застаўся неад’емнай часткай.

На сцэне раённага Цэнтра культуры ў гэты дзень за лепшае добраўпарадкаванне сваіх тэрыторый і ўсталяванне малых архітэктурных формаў дыпломамі былі адзначаны арганізацыі і ўстановы раённага цэнтра. Граматамі і грашовымі прэміямі ўзнагароджаны дзеці — юныя пераможцы конкурсу дзіцячай творчасці на прэмію раённага грамадскага аб’яднання “Беларускі саюз афіцэраў”. Памятнымі падарункамі ў межах акцыі “Стварай дабро” раённай арганізацыяй Беларускага аб’яднання “Чырвоны Крыж” былі адзначаны маладыя сем’і, у якіх напярэдадні 515-гадовага юбілею Шаркаўшчыны нарадзіліся дзеткі.

Шчырыя віншаванні падчас самай маштабнай урачыстасці года прагучалі і ў адрас сямейных пар, якія ў 2018-м адзначылі юбілеі сумеснага жыцця.

50 год у любові і згодзе пражылі разам Віктар Генадзьевіч і Наталля Мікалаеўна Конахі, у гэтым годзе сямейная пара адзначае свой залаты юбілей. 30 год пражылі разам Уладзімір Віктаравіч і Валянціна Адамаўна Кобелевы — з нагоды “жамчужнага” юбілею сямейнага жыцця яны былі запрошаны на сцэну. 25 год сумеснага жыцця адзначаюць у гэтым годзе сям’я Валерыя Мамертавіча і Ірэны Францаўны Бука, а таксама сям’я Андрэя Аляксандравіча і Ганны Вітальеўны Арсобаў.

Падчас цікавай канцэртнай праграмы, падрыхтаванай работнікамі культуры нашага раёна, былі ўзгаданы найбольш яркія і самыя значныя старонкі ў гісторыі Шаркаўшчыны. Не забыліся і пра знакамітых людзей, якія ў розныя гады нарадзіліся і жылі на шаркаўшчынскай зямлі. Ганаровымі гасцямі ўрачыстасці сталі ўраджэнцы нашага раёна. Сярод іх — майстар спорту міжнароднага класа, удзельнік Алімпійскіх гульняў у Атланце і Сіднэі, старшы трэнер Нацыянальнай зборнай нашай краіны па спартыўнай хадзьбе Віктар Гардзеевіч Гінько, артыст Віцебскай абласной філармоніі Валерый Часлававіч Бруйка, член Саюза пісьменнікаў Беларусі Віктар Аляксандравіч Праўдзін.

Для ўдзелу ў святочных мерапрыемствах у горад над Дзісной прыехалі дэлегацыі замежных гасцей з Латвіі і Літвы, з якімі наш рэгіён звязвае цеснае супрацоўніцтва. Гэта дэлегацыі Зарасайскага самакіравання (Рэспубліка Літва), Айзкраўкльскага самакіравання (Латвія), Даўгаўпілскай краявой  думы (Латвія), Екабпілскага самакіравання (Латвія), Зілупскага самакіравання (Латвія). Кіраўнікі дэлегацый павіншавалі Шаркаўшчыну і яе жыхароў з юбілеем. У сваіх выступленнях яны адзначылі прыгажосць і ўтульнасць нашага невялікага гарадскога пасёлка і гасціннасць шаркаўчан.

Адным з самых яркіх момантаў урачыстасці, на думку саміх шаркаўчан, стаў канцэрт Федэрацыі прафсаюзаў Беларусі, які быў прадстаўлены ў межах патрыятычнай акцыі “Мы — разам!”. На сцэну, каб павіншаваць шаркаўчан з юбілеем, выходзілі цудоўныя беларускія калектывы і артысты, добра вядомыя гледачам. У іх ліку — Аляксей Хлястоў, Вольга Плотнікава, музыкант і кампазітар Эдуард Ханок, іншыя зоркі беларускай эстрады, разам з якімі ў межах канцэртнай праграмы Мы — разам!” выступіў і фіналіст конкурсу “Новыя імёны Беларусі”, шаркаўчанін Уладзімір Касцюкевіч. Яго гледачы сустракалі гучнымі апладысментамі. Старшыня раённага аб’яднання прафсаюзаў Ігар Віктаравіч Малюгін ад імя прафсаюзнай арганізацыі ўручыў падзякі працоўным дынастыям шаркаўшчынскага краю, а таксама Падзякі Федэрацыі прафсаюзаў Беларусі і Прэзідыума Савета Віцебскага абласнога аб’яднання прафсаюзаў лепшым прафсаюзным лідарам раёна і працаўнікам сельскагаспадарчай вытворчасці.

Лепшыя выканаўцы і музычныя калектывы Шаркаўшчыны выходзілі на раённую сцэну ў дзень свята. У якасці вядучых галоўнай раённай урачыстасці выдатна выступілі Сяргей Райчонак і Алёна Сухаверская. Запомніліся шаркаўчанам і конкурс падворкаў — яркі, каларытны, самабытны, напоўнены традыцыямі і абрадамі нашай шаркаўшчынскай зямлі, а таксама шматлікія выставы, конкурсы і мерапрыемствы, што былі арганізаваны і праводзіліся ў межах прыгожага свята нашага гарадскога пасёлка.

Можна сказаць, што 2 ліпеня разам з кроплямі дажджу свята вылілася на вуліцы Шаркаўшчыны, напоўніўшы ўсё наваколле яркімі фарбамі і цудоўнай музыкай, смехам дзяцей, вясёлымі конкурсамі і выдатнымі канцэртамі. Завяршылася святочнай праграма дыскатэкай для моладзі ў раённым Цэнтры культуры. А пра самыя яркія падзеі і моманты ўрачыстасці вы, паважаныя чытачы, яшчэ прачытаеце на старонках “раёнкі”.

Вольга ЧАРНЯЎСКАЯ.

Фота Вольгі ЧАРНЯЎСКАЙ і Алены АНАНІЧ