Дзяўчыне, якая ўпала з дома на Нямізе, было 17 гадоў
Фота: Еўрарадыё
29 траўня Еўрарадыё паведамляла пра невядомую дзяўчыну, якая ўпала з дома на Нямізе ў Мінску і загінула. Як распавяла Еўрарадыё афіцыйная прадстаўніца Следчага камітэту па сталіцы Марына Дранькова, загінулай было 17 гадоў. Яна не жыла ў гэтым доме.
Цела дзяўчыны, якая ўпала з вышыні, было знойдзенае раніцай у аўторак у двары дома № 8. Па факце смерці Следчы камітэт праводзіць праверку. Пакуль не вядомыя падрабязнасці, як адбылося трагічнае здарэнне.
У народзе будынак называюць "Домам самагубцаў". Гэта мінскі аналаг моста "Залатыя вароты" ў Сан-Францыска і нью-ёркскага хмарачоса "Эмпайр-стэйт-білдынг" . Яго пачалі будаваць ў 1975 годзе, а апошні блок здалі ў 1989. Афіцыйна ён размяшчаецца па адрасах: вуліца Няміга 6, 8, 10, 12 і 14.
За апошнія некалькі гадоў гэта як мінімум чацвёрты выпадак самагубства ў двары згаданага дома. У 2011 годзе мужчына разбіўся насмерць. А ў 2014 годзе тут знайшлі цела 15-гадовай дзяўчынкі.