Бісернае хараство

Як толькі находзіць натхненне, маладая хайнічанка Вера Піцурэнка, якая працуе санітаркай тэрапеўтычнага аддзялення ЦРБ, бярэ бісер і пачынае ствараць кветкавую кампазіцыю, а дакладней сказаць – увасабляе ў жыццё сваю чарговую задумку.

Калі Вера вучылася ў Хойніцкім прафесійным ліцэі, тады і запісалася на гурток па бісерапляценню да выкладчыцы Ганны Пятроўны Кокінай. З таго часу дзяўчына і палюбіла рукадзелле. Падабаецца яе творчасць і сям’і ў Германіі, куды Веру запрашалі на аздараўленне ў школьныя гады – мноства асабістых работ ім завезла ў падарунак.

Як амаль кожнай прадстаўніцы прыгожай паловы чалавецтва, Веры Піцурэнка падабаюцца кветкі. Іх, а яшчэ дрэўцы сакуры і бансай яна і стварае часцей за ўсё ў бісерным выглядзе. А як прывабна і эстэтычна гэта выходзіць – глядзіце на фотаздымках.

Вікторыя МАРОЗ. Фота аўтара.