Купалаўскі тэатр рыхтуе прэм'еру "Талерантнасці"

На Вялікай сцэне Нацыянальнага акадэмічнага тэатра імя Янкі Купалы 27, 28 красавіка і 4, 10 мая адбудзецца прэм’ера спектакля "Талерантнасць" рэжысёра Мікалая Пінігіна паводле п’есы французскага драматурга Ясміны Рэза "Бог разні".

Яе імя вядома купалаўскаму гледачу па легендарным спектаклі "АРТ", да якога неаднойчы звяртаўся ў сваёй творчасці рэжысёр Мікалай Пінігін.

Як паведамілі ў тэатры, сцэнаграфіяй займаецца вядомы мастак Руслан Вашкевіч, які ўжо працаваў у тэатры над афармленнем спектакля "Школа падаткаплацельшчыкаў". Касцюмы зроблены паводле эскізаў Алёны Ігрушы.

Спектакль называецца "Талерантнасць", бо, па меркаванні Пінігіна, назва "Бог разні" для беларускага гледача будзе адразу перагукацца з тэмай вайны. Аднак тэма твора камічная і абсурдная – пабіліся два хлопцы-падлеткі, і цяпер іх бацькі намагаюцца інтэлігентна вырашыць, хто правы і вінаваты ў гэтай сітуацыі.

Адметнасць твораў Ясміны Рэза - ў здольнасці вельмі тонка раскрываць сапраўдную сутнасць герояў і паказваць рысы, якія хаваюцца за маскай талерантнасці і дабразычлівасці.

Паводле задумы Пінігіна, сюжэтная лінія ў спектаклі выходзіць па-за межы пакоя і ахоплівае пытанні талерантнасці ў больш шырокім кантэксце.