Кабіна дызель-цягніка загарэлася ў Кобрынскім раёне

Пажар у кабіне дызель-цягніка здарыўся ўвечары ў Кобрынскім раёне. Цягнік рухаўся па маршруце Брэст-Пінск. Надзвычайнае здарэнне адбылося каля вёскі Гарадзец Кобрынскага раёна прыкладна ў 19.50, перадае БЕЛТА.

Паводле інфармацыі МНС, загарэлася кабіна ў хваставой частцы саставу. Пасажыры і чыгуначнікі самастойна пакінулі цягнік. Ратавальнікам удалося аператыўна патушыць агонь.

Пажар пашкодзіў у цягніку маторны адсек. Пацярпелых пры інцыдэнце няма.

Дакладную прычыну здарэння высветляць эксперты.