З дзіцячай паліклінікі ў Мінску эвакуявалі 28 чалавек

Надзвычайная сітуацыя здарылася ўвечары 3 кастрычніка ў 15-й гарадской дзіцячай паліклініцы Мінска (вул. Голубева, 27). Пра гэта агенцтву БЕЛТА паведамілі ў Мінскім гарадскім упраўленні МНС.

У 19.25 ратавальнікі па сістэме перадачы паведамленняў аб пажары "Маланка" атрымалі сігнал пра задымленне ў паліклініцы. На месца здарэння аператыўна прыбылі пажарныя падраздзяленні. З будынка ратавальнікі эвакуявалі 28 чалавек. Пацярпелых пры здарэнні няма.

Паводле папярэдніх звестак, прычынай стала кароткае замыканне свяцільніка.