У Воранаўскім раёне перакуліўся Land Rover, загінулі два чалавекі
Фота: gaigrodno.by
У Воранаўскім раёне перакуліўся Land Rover Discovery, загінулі два чалавекі, яшчэ трое атрымалі траўмы і былі шпіталізаваныя. Як інфармуе прэс-служба ДАІ Гродзенскай вобласці, трагічнае ДТЗ адбылося каля 15.50 у нядзелю, 1 кастрычніка, на першым кіламетры аўтадарогі “Германішкі — Пераганцы — Навіянка”. 29-гадовы мужчына, які кіраваў легкавіком, няправільна выбраў хуткасць руху, з-за чаго не саўладаў з кіраваннем. Land Rover з’ехаў з дарогі ў кювет, дзе перакуліўся.
Кіроўца загінуў на месцы аўтааварыі, загінуў і адзін з пасажыраў ва ўзросце 25 гадоў. Агулам у аўтамабілі знаходзіліся шэсць чалавек, ніхто з іх не быў прышпілены рамянямі бяспекі, таму іх выкінула з машыны. Чатырох пасажыраў адвезлі ў бальніцу, толькі аднаго з іх пасля агляду адпусцілі дахаты. Па факце дарожна-транспартнага здарэння праводзіцца праверка. Экспертыза мусіць высветліць, ці не быў кіроўца ў стане алкагольнага ап’янення.