У выходныя ў Беларусі будзе спякотна

У выходныя ў Беларусі чакаюцца гарачае надвор'е і дажджы. Пра гэта агенцтву БЕЛТА распавяла намесніца начальніка службы метэаралагічных прагнозаў Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды Святлана Рыбакова.

Па словах спецыяліста, дзякуючы гарачыні апошніх дзён прагрэлася вада ў рэках і вадаёмах: на Бярэзіне, Дняпры, Прыпяці і Сожы — да 20-23 градусаў цяпла, на Заходняй Дзвіне і Нёмане — да 19-21, на Заслаўскім і Вілейскім вадасховішчах — да 19 і 21 градуса адпаведна, на возеры Нарач — да 20 градусаў.

У ноч на 29 ліпеня на большай частцы тэрыторыі краіны пройдуць дажджы, у крайніх паўночна-ўсходніх раёнах — моцныя. Удзень у асобных раёнах таксама прагназуюцца кароткачасовыя дажджы, месцамі — з навальніцамі. Уначы тэмпература паветра будзе ад 11 да 18 вышэй за нуль, а ўдзень — 20-25 градусаў .

У нядзелю, 30 ліпеня, будзе пераважна без ападкаў. Уначы ў асобных раёнах чакаецца слабы туман. Тэмпература паветра ўначы будзе ад 11 да 16 градусаў, удзень слупок тэрмометра падымецца да 22-28 цяпла, па Брэстчыне тэмпература паветра прагрэецца да 30 градусаў.