Жыхарка Магілёва ехала ва Украіну з… савецкім пашпартам

Жыхарка Магілёва ехала ва Украіну з… савецкім пашпартам. Здарэнне адбылося ў пункце пропуску “Новая Гута” на беларуска-ўкраінскай мяжы. Высветлілася, што пашпарт Рэспублікі Беларусь 68-гадовая жанчына атрымліваць адмаўляецца прынцыпова, паведамляе прэс-служба Дзяржаўнага памежнага камітэта Беларусі. Атрымліваецца, што жыхарка Магілёва жыве з дакументам неіснуючай дзяржавы ўжо амаль 26 гадоў.

Падобны выпадак адбыўся ў кастрычніку мінулага года. 63-гадовая беларуска, якая жыве ў ЗША, уязджала ў нашу краіну праз пункт пропуску “Прывалка” на беларуска-літоўскай мяжы і прад’явіла пашпарт грамадзянкі СССР, выдадзены ў 1984 годзе. Яе папярэдзілі, але праз мяжу прапусцілі.