Інфармацыя пра мініраванне парку Чалюскінцаў не пацвердзілася

Звесткі пра мініраванне парку Чалюскінцаў у Мінску апынуліся фальшывымі. Пра гэта заявіў афіцыйны прадстаўнік МУС Канстанцін Шалькевіч.

"Мерапрыемствы па праверцы парку Чалюскінцаў скончаныя. Інфармацыя аб мініраванні не пацвердзілася", — цытуе БЕЛТА яго словы. 

Як паведамляла Еўрарадыё, невядомы чалавек каля 12-й затэлефанаваў на нумар 102 і паведаміў пра міну ў сталічным парку Чалюскінцаў.

Да месца выбылі работнікі ўзрыватэхнічнага цэнтра ўнутраных войскаў. На месцы працавалі тры разлікі спецыялістаў. З парку эвакуявалі ўсіх наведнікаў. 

Аднак ніякіх выбуховых прадметаў сапёры не выявілі.