У Рагачоўскім раёне падчас палявых работ знайшлі мех з парэшткамі чалавека
Здымак з архіву. Фота: Bymedia.net
У Рагачоўскім раёне падчас вясенне-палявых работ знайшлі мех з касцянымі парэшткамі чалавека. Здарылася гэта на тэрыторыі сельгаспрадпрыемства ў вёсцы Хатоўня. Як паведаміў БЕЛТА афіцыйны прадстаўнік упраўлення Дзяржаўнага камітэта судовых экспертыз па Гомельскай вобласці Руслан Габрылёў, раней на тым месцы быў прыватны дом, у якім ніхто не жыў, і яго знеслі. Пасля гэтага ўчастак стаў уласнасцю сельгаспрадпрыемства.
Праваахоўнікі папярэдне высветлілі, што парэшткі могуць належаць мужчыну, 1959 года нараджэння, які жыў у гэтым доме. 16 гадоў таму ён паехаў на заробкі ў Расію і знік. Эксперты высвятляюць прычыны яго смерці. На чэрапе былі выяўленыя пашкоджанні, магчыма, ад сякеры. Пад падазрэнне трапіў старэйшы брат загінулага, з якім у яго былі канфлікты з-за пенсіі маці і грашовай кампенсацыі, якую выплацілі ёй як былому вязню нацысцкіх канцлагераў. Але брат памёр у 2010 годзе, што ўскладняе расследаванне, адзначае Габрылёў. Праверку праводзіць Рагачоўскі аддзел Следчага камітэта.