Следчыя раскрылі забойства мінчанкі, якую муж забіў "спантанна"
Фота: sk.gov.by
Упраўленне Следчага камітэта па Мінскай вобласці завяршыла расследаванне крымінальнай справы аб забойстве жанчыны, труп якой знайшлі 30 верасня 2016 года ў Вілейскім вадасховішчы.
Само забойства адбылося тры гады таму. Тады ў траўні 2013 года 39-гадовая мінчанка знікла без вестак. Яе цела знайшлі толькі ўвосень 2016-га. Па падазрэнні ў злачынстве быў затрыманы яе муж, якому цяпер ужо споўнілася 45 гадоў. Пад цяжарам доказаў мужчына прызнаўся ва ўчыненым злачынстве.
"Расследаваннем выяўлена, што рашэнне мужчыны пра забойства ў яго ўзнікла спантанна", — адзначае прэс-служба Следчага камітэта. На пачатку траўня 2013 года жанчына прыйшла ў гараж, які арандаваў абвінавачаны. Былыя муж і жонка пасварыліся, пасля чаго мужчына стукнуў жанчыну па галаве металічным прадметам, а потым задушыў вяроўкай.
Цела забітай ён паклаў у сумку і на аўтамабілі вывез у лес у Чэрвеньскім раёне. Праз месяц сумку з трупам ён перавёз на Вілейскае вадасховішча і ўтапіў.
Следства завяршыла збор доказаў. Праведзеныя допыты, праверкі паказанняў на месцы, экспертызы, у тым ліку судова-псіхіятрычная. Дарэчы, яна засведчыла, што падчас сваіх дзеянняў абвінавачаны мог цалкам усведамляць іх значэнне і кіраваць імі.
Мужчыну вінавацяць у забойстве. Яго крымінальная справа перададзеная ў пракуратуру для накіравання ў суд.