На пажары ў Мінску выратавалі мужчыну (фота)

3 студзеня ў 23.22 сталічных ратавальнікаў выклікалі на пажар у двухпавярховым трохкватэрным жылым доме на вуліцы Айвазоўскага.

Прыбыўшы на месца выкліку, ратавальнікі пабачылі, што з другога паверха ідзе дым. Як паведамляе прэс-служба МНС, гаспадыні дзвюх кватэраў пакінулі сваё жыллё самастойна яшчэ да прыезду ратавальнікаў.

У трэцяй кватэры ратавальнікі знайшлі на падлозе і вынеслі непрытомнага гаспадара — 47-гадовага мужчыну. Пасля гэтага яго шпіталізавалі з тэрмічным апёкам галавы, шыі, тулава 1-3-й ступені (15%), а атксама атручваннем прадуктамі гарэння.

Агонь пашкодзіў маёмасць і перакрыцці.

Мяркуецца, што прычынай пажару стала неасцярожнае карыстанне агнём пры курэнні ў нецвярозым стане.