40 кватэраў у Мінску пасля пажару суткі заставаліся без электрычнасці (фота)

Пажар у пад'ездзе шматкватэрнага дома па вуліцы Лабанка больш як на суткі пакінуў жыхароў 40 кватэраў без электрычнасці.

Як паведамляе прэс-служба Мінскага гарадскога ўпраўлення МНС, выклік ратавальнікам паступіў каля 10-й гадзіны раніцы 12 лістапада. Паведамлялася пра моцнае задымленне ў пад'ездзе. На месцы здарэння ратавальнікі выявілі, што загарэлася праводка ў электрашчытах другога пад'езда дзесяціпавярховага жылога дома.

Агонь пашкодзіў электрашчыты, праводка, пад'езд быў закураны. Аднавіць электразабеспячэнне ўдалося толькі на наступны дзень у 16.40.

Меркаванай прычынай здарэння называюць кароткае замыканне.