Сапсаваны банкамат выдаў беспрацоўнаму паўмільёна рублёў

Сапсаваны банкамат выдаў беспрацоўнаму паўмільёна расійскіх рублёў (гэта каля 8 тысяч долараў). Здарэнне адбылося ў Маскве. Паліцыя ўжо затрымала 40-гадовага мужчыну. Яго падазраюць у крадзяжы грошай з банкамата.

Як інфармуе "Бі-Бі-Сі", мужчына прыехаў у расійскую сталіцу з Белгарадскай вобласці. Ён здымаў з банкаўскай карткі 4 тысячы расійскіх рублёў, а банкамат выдаў 20 тысяч. Мужчына зразумеў, што адбыўся тэхнічны збой і скарыстаўся гэтым — працягваў здымаць грошы. Пошукі зламысніка пачаліся пасля таго, як у паліцыю звярнуўся прадстаўнік банка. Крымінальную справу распачалі па артыкуле "Крадзеж". Мужчыне пагражае да шасці гадоў пазбаўлення волі. Пад вартай яго не сталі трымаць, адпусцілі пад падпіску аб нявыездзе.