Амерыканца ў Баранавічах забілі за тое, што кепска выказваўся пра Лукашэнку
Фота: sputnik.by
У судзе Баранавічаў і Баранавіцкага раёна працягваецца працэс над мясцовым жыхаром, які забіў і расчляніў грамадзяніна ЗША 67-гадовага Саламона Ясмана.
Абвінавачаны не прызнае сваёй віны ў здзеку з трупа. Таксама ён адмаўляе, што забіты быў у бездапаможным стане.
Свае дзеянні мужчына патлумачыў "палітычнымі" прычынамі. У вечар забойства яны разам з амерыканцам глядзелі па тэлевізары выступ кіраўніка Беларусі.
"Саламон няўхвальна выказваўся пра кіраўніка дзяржавы, сказаў, што той краіну на калені паставіў. Потым сказаў, што беларусы ўсё сцерпяць, а за 10 долараў мінет любому зробяць. Я не стрымаўся і стукнуў яго ў сківіцу", — перадае intex-press.by словы падсуднага.
Потым, як кажа мужчына, пачалася бойка, падчас якой ён задушыў Ясмана. Падсудны захацеў пазбавіцца ад трупа. Мужчына кажа, што раздзяліць труп вырашыў з прычыны таго, што хвароба не дазваляла яму падняць цела забітага.
Мужчына прызнаў, што ўмее раздзелваць жывёлаў, бо восем гадоў таму займаўся гадаваннем і забоем свіней. Кухонным нажом ён расчляніў труп, склаў часткі ў вёдры і скруткі, вывез іх на сваім аўто за горад і закапаў.
Мужчына заяўляе, што не браў ніякія грошы забітага — толькі фотаапарат і від на жыхарства. Пазней у вокладцы дакумента ён нібыта знайшоў 200 долараў ЗША.
Удава забітага амерыканца называе іншую прычыну забойства. Па яе словах, мужчына пазычыў у яе мужа вялікую суму грошай.