У Крупскім раёне слесар на аўтапагрузчыку ледзь не забіў трактарыста
Фота: kyrtag.kg
Трагічнае здарэнне адбылося ў аграгарадку Ухвал Крупскага раёна Міншчыны. Як паведамляе БЕЛТА, там слесар на пагрузчыку наўмысна прыціснуў трактар, у кабіне якога знаходзіўся трактарыст.
Інцыдэнт адбыўся каля будынка рамонтна-машыннай майстэрні, распавёў начальнік прэс-службы УУС Мінаблвыканкама Яўген Сачак. 45-гадовы слесар майстэрні на пагрузчыку знарок тройчы стукнуў каўшом па трактары, у кабіне якога сядзеў 52-гадовы трактарыст. Ад удараў трактар перакуліўся. Потым мужчына на пагрузчыку прыціснуў трактар каўшом да будынка, так што дэфармавалася кабіна. На шчасце, трактарыст паспеў выскачыць з кабіны.
Калегі паспрабавалі затрымаць вінаваўцу інцыдэнту, але той кінуўся пад цягнік. Пры гэтым ён атрымаў смяротныя траўмы.
Праваахоўнікі пачалі крымінальную справу па факце замаху на забойства (ч.1 арт.14 і ч.1 арт.139 Крымінальнага кодэксу). Адна з версій, якую разглядае следства, — праблемы з псіхічным здароўем слесара.