Віцяблянін заплаціў падлеткам, каб спаліць аўтамабіль прадпрымальніка (відэа)

Віцебскія праваахоўнікі расследавалі пажар аўтамабіля, які адбыўся ўначы 10 траўня на праспекце Фрунзе. Агонь тады пашкодзіў салон легкавіка.

Як выявілі супрацоўнікі 7-га ўпраўлення (па Віцебскай вобласці) ГУБАЗіК МУС, аўтамабіль быў падпалены двума 16-гадовымі падлеткамі з Віцебска. Больш за тое — падпал аўто рабіўся паводле замовы, якую падлеткам зрабіў айчым аднаго з іх. Гэта 39-гадовы раней судзімы віцяблянін. Ён заплаціў хлопцам па 100 еўра, паведамляюць "Народныя навіны Віцебска" са спасылкай на прэс-службу УУС Віцебскага аблвыканкама.

Адзін з падлеткаў вырашыў пахваліцца і размясціў відэа падпалу ў інтэрнэце. Правахоўнікі забралі гэты відэазапіс, а таксама ролік тым, як сябры выпрабоўвалі "кактэйлі Молатава".

30 траўня праваахоўнікі затрымалі замоўцу і абодвух падлеткаў, калі яны пераносілі пакет з сямю бутэлькамі "кактэйлю Молатава".

Міліцыя выявіла, што віцяблянін прапанаваў хлопцам падпаліць яшчэ і катэдж з дапамогай "кактэйлю Молатава". За гэта мужчына абяцаў падлеткам ўжо 1500 еўра.

Затрыманых змясцілі ў ізалятар часовага ўтрымання пры УУС Віцебскага аблвыканкама. Праваахоўнікі праводзяць следчыя дзеянні і аператыўна-вышуковыя мерапрыемствы па раней заведзенай крымінальнай справе. Зламыснікам пагражае да 10 гадоў пазбаўлення волі. Акрамя таго, за выкарыстанне "кактэйлю Молатава" Крымінальны кодэкс прадугледжвае да 5 гадоў пазбаўлення волі.