У Барысаве міліцыянер зняў паўтарагадовае дзіця з даху крамы

У Барысаве міліцыянер зняў паўтарагадовае дзіця з даху крамы. Здарэнне адбылося раніцай 25 сакавіка. Маёр міліцыі Ігар Пазнякоў ішоў па тратуары і заўважыў маленькае дзіця, якое поўзала побач з краем даху крамы, які прымыкае да жылога дома.

Як інфармуе прэс-афіцэр Барысаўскага РУУС Яна Мініч, афіцэр забег да другі паверх і пачаў званіць у кватэры. Дзверы адной з іх адчыніла маладая дзяўчына. Высветлілася, што гэта яе сын вылез на дах праз акно кватэры, а яна не заўважыла. Міліцыянер пайшоў тым жа шляхам, асцярожна наблізіўся да хлопчыка, каб яго не спалохаць, узяў яго на рукі і вярнуў маці. Жанчына, дарэчы, ледзь не страціла прытомнасць, пакуль Ігар Пазнякоў ратаваў яе дзіця.