Марскія расліны: карысць ці шкода? (+стравы з водарасцяў)

Прывучайце дзяцей да водарасцяў змалку. Гэта карысна.

Многія беларусы прывыклі думаць пра водарасці як пра тое, што павінна знаходзіцца ў морах ці акварыумах, але ніяк не на кухонным стале. Але марскія расліны могуць дапамагчы ва ўмацаванні нашага здароўя.

– На ўсёй тэрыторыі нашай краіны вельмі мала ёду, – кажа дыетолаг Ганна Белавусава. – Дактары часта кажуць, што неабходны аб’ём гэтага мікраэлемента мы можам атрымаць з ёдаванай солі, грэчкі, хурмы і грэцкіх арэхаў. Так, для нас яны сапраўды з’яўляюцца асноўнымі крыніцамі ёду, але неабходную яго колькасць з гэтых прадуктаў атрымаць цяжка. А вось у водарасцях ёду надзвычай шмат, прычым з іх ён лёгка засвойваецца і хутка перапрацоўваецца арганізмам.

Ад водарасцяў не схавацца

Часта водарасці адбіваюць жаданне есці адным сваім выглядам: яны маюць зялёны ці карычняваты колер, бясформенную кансістэнцыю. Але нават пры катэгарычнай адмове ад водарасцяў у рацыёне ніводны з нас не можа сцвярджаць, што ніколі ў жыцці не каштаваў іх.

Справа ў тым, што водарасці – абавязковы складнік многіх прадуктаў. Агар-агар ці карагінан, якія атрымліваюць з водарасцяў, ужываюцца пры вытворчасці мармеладу, зефіру, марожанага і некаторых малочных прадуктаў. Гэтыя кампаненты надаюць прадуктам неабходную кансістэнцыю і пры гэтым не дадаюць лішніх калорый.

Да таго ж часта водарасці ўваходзяць у склад касметыкі. Не толькі розных крэмаў для догляду скуры, але і тушы, памады, ценяў.

У водарасцях – палова табліцы Мендзялеева

Асабліва карыснымі водарасці будуць для тых, чыя праца звязаная з нервовым напружаннем. Чым больш мы нервуемся – тым больш ёду патрэбна арганізму. Да таго ж акрамя ёду ў склад водарасцяў уваходзяць бор і бром, якія дапамагаюць супакоіцца і расслабіцца.

Важным з’яўляецца і селен. Ён дапамае адбывацца сотням рэакцый, што працякаюць у арганізме. Спіс карысных элементаў можна працягваць: жалеза, кальцый, магній, калій, марганец…

Не трэба забываць і аб тым, што водарасці – крыніца расліннага бялку, які лёгка засвойваецца арганізмам. Гэта акалічнасць набывае асаблівую важнасць для вегетарыянцаў, якія часта не атрымліваюць неабходную колькасць бялку.

Карысць водарасцяў зразумелі ўжо ў многіх краінах свету. У Італіі, Францыі, Вялікабрытаніі водарасці пачалі разводзіць штучным спосабам, нягледзячы на тое, што гэтыя краіны маюць выхад да мора.

“А што, водарасці бываюць розныя?”

Для таго, каб зразумець, што водарасці – не самы хадавы тавар у нашых крамах, дастаткова прайсціся па найбуйнейшых гандлёвых цэнтрах Маладзечна.

Ва ўсіх крамах можна знайсці марскую капусту, ці, як яе называюць іначай, ламінарыю. Яе можна набыць асобна, а таксама ў складзе разнастайных салатаў. У некаторых крамах ламінарыю можна набыць на вагу. Яна бывае сушанай, замарожанай і кансерваванай. Сушаную часцей за ўсё набываюць у аптэках.

– Мы прадаём марскую капусту на вагу, – кажа таваразнаўца крамы адной з гандлёвых сетак Маладзечна. – Не магу сказаць, што яна карыстаецца асаблівай папулярнасцю ў пакупнікоў. Так, від водарасцяў у нас толькі адзін. А што, яны бываюць розныя?

Насамрэч, у свеце налічваецца каля 20 відаў водарасцяў, якія прыдатныя для харчавання. З распаўсюджаных можна адзначыць фукус (альбо марскі дуб), парфіру, ульву (марская салата). Знайсці іх нават у сталічных крамах – нялёгкая задача.

Яшчэ адзін спосаб пакаштаваць водарасці ў нашым рэгіёне – набыць сушы. Для іх прыгатавання часта выкарыстоўваюцца тыя ж ламінарыі, але вялікімі, непарэзанымі кавалкамі. Менавіта ў іх найчасцей загортваюць рыбу і рыс.

Парады часцей ужываць у ежу водарасці будуць карыснымі для ўсіх беларусаў. Для таго, каб ліквідаваць недахоп ёду, неабавязкова бегчы ў аптэку. Часам дастаткова пачаць з ламінарыі.

Паўсядзённыя стравы з водарасцямі

Бутэрброды з сушанай ламінарыяй

Такія бутэрброды можна гатаваць на кожны дзень.

Для гэтага неабходна здрабніць сушаную марскую капусту, дадаць яе ў мяккае масла і пасаліць. Атрыманую масу намазаць на хлеб і на некаторы час паставіць у халадзільнік.

Водарасці замест солі

Сушаную ламінарыю альбо фукус можна здрабніць і дадаваць у стравы замест солі. Дадаўшы такую прыправу да рысу, салаты, супу, вы адчуеце саланаваты смак, а таксама лёгкі пах ёду.

Адзіная заўвага: дадаваць водарасці трэба ў гатовую страву, каб яны захавалі свае карысныя ўласцівасці. Да таго ж дыетолагі не рэкамендуюць спалучаць водарасці з капустай, кукурузай і гарчыцай: гэтыя прадукты перашкаджаюць арганізму засвойваць ёд.

Салата з марской капустай

Ламінарыя традыцыйна ўжываецца для прыгатавання салатаў. Вашай увазе – адзін з іх.

Для прыгатавання спатрэбіцца балгарскі перац, памідоры, цыбуля і марская капуста. Усе прадукты парэзаць і змяшаць, пасля заправіць аліўкавым алеем з лімонным сокам.

Аляксандра ПАРАХНЯ.

Фота Настассі Роўды.