Журналістцы «Нашай Нівы» пагражаюць збіццём

«Будзеце мець бледны выгляд і рэдкія зубы», — патэлефанаваў сёння незнаёмы на хатні нумар відэааператаркі «НН» Таццяны Гаўрыльчык.

Кампанія па цкаванні цкаванні незалежных журналістаў набірае абароты. Сёння, 3 студзеня, у 17.26 на хатні нумар відэааператаркі «НН» Таццяны Гаўрыльчык патэлефанаваў незнаёмы, які два разы паўтарыў ёй: «Будете иметь бледный вид и редкие зубы».

Нагадаем, што падчас пратэстаў 19 снежня Таццяна Гаўрыльчык здымала на відэа акцыю пратэсту, робячы гэта на цалкам законных падставах — як штатная журналістка афіцыйна зарэгістраванага выдання. Праз тыдзень пасля гэтага прайшоў шэраг ператрусаў у рэдакцыях незалежных СМІ (уключна з «Нашай Нівай») і кватэрах журналістаў. КДБ шукала найперш фота- і відэаматэрыялы, якія могуць з’яўляцца доказамі ў заведзеных крымінальных справах аб масавых беспарадках у Мінску і аб эпізодзе з зрываннем дзяржаўнага сцяга з будынка КДБ.

31 снежня — у дзень перад Новым годам — чатыры супрацоўнікі КДБ правялі ператрус на кватэры ў Таццяны Гаўрыльчык, сканфіскавалі камп’ютар і відэакамеру. Падчас ператрусу кадэбісты вусна прапанавалі Таццяне прыехаць да іх на гутарку 3 студзеня.

3 студзеня Таццяне патэлефанавалі, яшчэ раз прапанаваўшы з’явіцца на гутарку ў КДБ, а 15-й гадзіне. На гутарку Таццяна прыйшла — але не адна, а з адвакатам. У КДБ пачалі настойваць на тым, каб гутарка праводзілася без прысутнасці адваката. Акрамя гэтага Таццяне паведамілі, што яна не з’яўляецца ні сведкай ні падазраванай, а гутарка — цалкам нефармальная, з мэтай дапамагчы следству.

Супрацоўнік КДБ намякнуў на тое, што ў тым выпадку, калі Таццяна пагодзіцца на размову без адваката, яна — і ўся Рэдакцыя «Нашай Нівы» — у больш хуткі тэрмін атрымае назад сваё абсталяванне (мяркуючы па ўсім, мелася на ўвазе відэакамера і камп"ютары). Тым не менш, Таццяна размаўляць без адваката адмовілася.

Увечары гэтага ж дня, прыкладна праз дзве гадзіны пасля таго, як КДБ адмовілася правесці размову з Таццянай у прысутнасці адваката, яна атрымала ананімнае тэлефанаванне з пагрозамі.

Званок быў на хатні тэлефон Т.Гаўрыльчык, а 17.25.

Невядомы паўтарыў пагрозу двойчы, пасля чаго журналістка кінула слухаўку. Тэлефанаванне не паўтаралася.

Афіцыйная скарга ў міліцыю на факт пагрозаў журналістцы «НН» будзе скіраваная неадкладна.