У Лідзе пройдзе прэзентацыя першага беларускага манеўранага лакаматыва

15 снежня ў Лідзе (Гродзенская вобласць) да ўвагі грамадскасці будзе прадстаўлены першы беларускі манеўраны лакаматыў. Прэзентацыя адбудзецца ў рамках I злёту машыністаў Беларускай чыгункі (БЧ).

Паводле інфармацыі прэс-службы БЧ, для ўдзелу ў злёце ў Ліду прыедуць больш за 160 машыністаў з 17 лакаматыўных дэпо краіны. Чакаецца таксама ўдзел міністра транспарту і камунікацый Івана Шчэрбы і іншых прадстаўнікоў урада, начальніка БЧ Анатоля Сівака, старшыні Гродзенскага аблвыканкама Сямёна Шапіры.

Удзельнікі злёту абмяркуюць перспектывы развіцця лакаматыўнай гаспадаркі БЧ, пытанні зніжэння расходаў на эксплуатацыю, тэхабслугоўванне і рамонт лакаматываў і маторвагоннага рухомага саставу. Будуць разгледжаныя асаблівасці працы машыністаў, удасканаленне ўмоў працы і адпачынку лакаматыўных брыгад.

Манеўраны лакаматыў серыі ТМЭ1 створаны ў лакаматыўным дэпо Ліды. «У Беларусі праект такога кшталту рэалізуецца ўпершыню і фактычна азначае першы крок да арганізацыі лакаматывабудавання ў краіне», — адзначае прэс-служба БЧ.