Гамяльчанін за тры хвіліны з`еў 19 сасісак

Дзяржаўнае аб`яднанне «Гомельмясамалпрам» 2 кастрычніка ўпершыню арганізавала абласны фестываль «Мяса-малочная краіна — 2010». Мерапрыемства праводзілася на плошчы Паўстання ў Гомелі.

Падчас фестывалю адбылося некалькі забаўляльных конкурсаў. Гамяльчанам было прапанавана на хуткасць есці сасіскі, піць малако і кефір. Паводле ўмоў «сасісачнага» конкурсу, удзельнікі павінны былі за тры хвіліны з`есці 30 вараных сасісак. З васьмі ўдзельнікаў зрабіць гэта не ўдалося нікому, таму пераможцам стаў той, хто з`еў найбольш сасісак. Выйграў конкурс гамяльчанін, які з`еў за тры хвіліны 19 сасісак. Ён атрымаў ва ўзнагароду некалькі кольцаў сасісак. За конкурсам назіраў старшыня гарвыканкама Віктар Піліпец.

Згодна з умовамі конкурсу «Малочныя вусы», літр кефіру трэба было выпіць з гладыша за хвіліну. Малады мужчына выканаў заданне датэрмінова і быў узнагароджаны наборам малочных тавараў. Яшчэ адзін конкурс прадугледжваў піццё малака з дзіцячай бутэлечкі з соскай. Пераможца таксама атрымаў пакет з малочнай прадукцыяй.

У межах свята таксама адбыліся выстава-кірмашмяса-малочнай прадукцыі, дэгустацыі і іншыя конкурсы. Вечарам была арганізавана маладзёжная праграма — дыскатэка, выступленне гурту «Городская тоска» і мясцовых маладзёжных калектываў.