Занепакоены прэзідэнт, альбо Лёгкі дотык фоташопу

The Economist апублікаваў на вокладцы фота Абамы, які выглядае глыбока засмучаным сітуацыяй у Мексіканскім заліве. Але арыгінальны здымак выглядаў зусім інакш.

На здымку — Барак Абама на пляжы ў Луізіяне, сумны, з апушчанай галавой. Здымак, здавалася б, ідэальна паказвае, наколькі засмучае прэзідэнта сітуацыя ў Мексіканскім заліве. На першапачатковым жа здымку побач з Абамам стаяць адмірал Ален з берагавой аховы і Шарлота Рэндалф, прадстаўніца мясцовых уладаў. Прэзідэнт проста нахіліўся да суразмоўцаў.

Агенцтва Reuters, якое валодае фатаграфіямі, вядома ж, не задаволенае зменамі.

Учора на сайце The Economist з’явілася тлумачэнне:

«Часам мы рэдагуем фотаздымкі, якія з’яўляюцца на вокладцы, але ніколі — тыя, якія публікуюць усярэдзіне», — піша выданне.

«Мы выразалі Шарлоту Рэндалф не для таго каб змяніць палітычную танальнасць здымка, а таму, што прысутнасць невядомай жанчыны была б незразумелай для чытачоў.

Мы рэдагуем фота з вокладкі, як правіла, з дзвюх прычынаў. Па-першае, проста ў жарт — як у сакавіку, калі падчас абмеркаванняў рэформы сістэмы аховы здароўя мы змясцілі фатаграфію Абамы з бінтавай павязкай на галаве. Па-другое — каб выдаліць фон і падкрэсліць значнасць цэнтральных герояў».

Пад тлумачэннем было шмат чытацкіх каментароў. Некаторыя адчуваюць сябе падманутымі. «Змяненне інфармацыі ў здымку роўная змене фактаў у тэксце», — кажа адзін з чытачоў. Іншыя сцвярджаюць, што рэдагаванне фатаграфій — норма.

deser.pl