З-за cпальвання смецця на Вілейшчыне згарэлі дом і хлявы

Фота з сайта lifecity.com.ua

У суботу, 5 красавіка гарэлі дом і пабудовы ў вёсцы Варонічы. Паведамілі пра гэта ў пяць гадзін вечара.

– Па прыбыцці на месца здарэння выратавальнікі убачылі, што адкрытым полымем гараць дом і хлявы. Людзей усярэдзіне не было, – паведаміў старшы інспектар Дзяржпажнагляду райаддзела па надзвычайных сітуацыях Дзяніс Гаўрышчук.

У выніку згарэлі пяць хлявоў. Таксама выгараў знутры драўляны дом, знішчаны прыбудаваны да яго хлеў.

Як аказалася, гараджане прыбіраліся на прысядзібным участку, вырашылі  спаліць смецце. У выніку загарэлася сухая трава побач і агонь перакінуўся на пабудовы.