Дакладны алгарытм

У сталічнай вобласці прайшлі маштабныя вучэнні па ліквідацыі надзвычайных сітуацый, выкліканых неспрыяльнымі ўмовамі надвор’я.

Як паведамілі ў Мінскім абласным упраўленні Міністэрства па надзвычайных сітуацыях, разам з супрацоўнікамі МНС у вучэннях прынялі ўдзел прадстаўнікі аварыйных і спецыяльных службаў — усяго каля дзясятка структур.

Адпрацоўка дзеянняў праходзіла на трох пляцоўках, асноўныя падзеі разгортваліся на базе ААТ «Смалявіцкая бройлерная птушкафабрыка». Гатоўнасць спецфарміраванняў да дзеянняў у асенне-зімовы перыяд, праблемныя пытанні і шляхі іх вырашэння абмеркаваны на пасяджэнні камісіі па НС пры Мінаблвыканкаме. Перад кожным з кіраўнікоў абласных арганізацый была змадэліравана абстаноўка, якая можа скласціся ў выніку падзення тэмпературы паветра і выпадзення вялікай колькасці ападкаў. Такім чынам, адпрацоўваліся алгарытмы дзеянняў службаў у сітуацыях, выкліканых неспрыяльнымі надворнымі ўмовамі.

На першых двух этапах вучэнняў іх удзельнікі аднаўлялі цепла- і энергазабеспячэнне на птушкафабрыцы. Заключны этап прайшоў на ўчастку аўтадарогі Смалявічы—Лагойск, дзе трэба было дэблакіраваць пацярпелых у дарожна-транспартным здарэнні, эвакуіраваць транспартныя сродкі, затрыманыя снежнай намеццю, ліквідаваць затор.

Сітуацыі былі максімальна набліжаныя на рэальных. Для правядзення вучэнняў было прыцягнута больш за 30 адзінак спецыяльнай і дапаможнай тэхнікі, а маніторынг абстаноўкі ажыццяўляў беспілотнік «Бусел-М».