На Міншчыне тоне кожны 10-тысячны
У сераду, 26 чэрвеня, у Крыніцы патануў 17-гадовы хлопец.
Ён вучыўся на другім курсе політэхнічнага каледжа. Прыехаў з Нясвіжскага раёна.
Хлопец быў на сажалцы каля Крыніцы, у якой купанне забароненае, разам з сябрам. Як потым распавёў сябар загінулага, яны разам купаліся, пасля Рамана схапіла сутарга. Яны былі цвярозыя, а Раман умеў плаваць.
Паведамленне на пульт МНС паступіла каля 16 гадзін.
Сёлета ў раёне ў вадзе загінула пяць чалавек, сярод іх трое – жыхары нашага раёна.
– І ўсе яны маладыя, да 30 гадоў, – адзначае старшыня грамадскага аб’яднання ў Маладзечне “Таварыства выратавання на водах” Мікалай Паўлушаў.
Звычайна людзі тонуць, калі купаюцца. Аднак сёлета здарылася і два нетыповыя выпадкі.
Першы выпадак адбыўся 15 чэрвеня ў Вязынцы. Кіроўца з’ехаў у канал на машыне і загінуў ад асфіксіі.
Другі – 12 мая ў Ласях. Двое жыхароў Чысці, якія нідзе не працуюць, хлопец і дзяўчына, паехалі да вадаёма. Быў позні вечар. Яны выпілі. Пачалі сварыцца. Хлопец некалькі разоў ударыў 22-гадовую дзяўчыну.
Ад удару яна звалілася ў ваду і захлынулася.
Летась на Маладзечаншчыне патанулі мужчыны
Летась у раёне ў вадзе загінулі дзевяць чалавек, усе мужчыны 23-57 год. Пяцёра з іх нідзе і не працавалі, і не вучыліся. Як мінімум, шасцёра былі нецвярозыя. Сярод іх дваім не было і 30 год, пяцярым – 30-50 год, яшчэ дваім было за 50.
Сёлета трое тапельцаў былі нецвярозымі.
На 1 ліпеня ў Мінскай вобласці загінула 18 чалавек. Летась усяго ў Беларусі патанула 704 чалавекі, сярод іх 51 дзіця. На Міншчыне патанула 136 чалавек, з іх дзевяцера – дзеці.
Мікалай Паўлушаў паведаміў, што, паводле сярэдняй статыстыкі па вобласці, стабільна тоне адзін чалавек на дзесяць тысяч. Па рэспубліцы крыху іншая статыстыка: тоне дзевяць чалавек на сто тысяч.
Дзе часта тонуць людзі
Ёсць некалькі вадаёмаў, ДЗЕ ПАСТАЯННА ТОНУЦЬ ЛЮДЗІ. Прычым ва ўсіх іх купацца забаронена. Іх пералічыў старшыня грамадскага аб’яднання ў Маладзечне “Таварыства выратавання на водах”:
– вадаём у Насілаве
– кар’ер каля Ізабеліна
– кар’ер у Мароськах
– канал Вілейска-Мінскай воднай сістэмы
– вадаём у Крыніцы.
Зоя ХРУЦКАЯ.
Фота gorodka.ru