Даішнікі ўзмацняюць кантроль над матацыклістамі і ліхачамі

Дзяржаўны інспектар дарожна-паставой службы аддзялення ДАІ Маладзечанскага райаддзела міліцыі Дзмітры Стасюлевіч.

Дзве акцыі па бяспецы дарожнага руху праводзіць дзяржаўтаінспекцыя. Першая называецца “Колаў менш – небяспекі больш”. Пачалася 16 красавіка, доўжыцца будзе да 29 красавіка. Другая пад назвай “Хуткасць” праходзіць ад 17 да 22 красавіка.

Інспектар дарожна-паставой службы маладзечанскай дзяржаўтаінспекцыі Дзмітры Стасюлевіч расказаў у інтэрв’ю “РГ”: мэта акцыі “Колаў менш – небяспекі больш” – папярэдзіць дарожна-транспартныя здарэнні з удзелам веласіпедыстаў, матацыклістаў і скутарыстаў.

Інспектар нагадаў: кожны гаспадар матацыкла, мапеда ці скутара павінен зарэгістраваць свой транспартны сродак у міжраённым рэгістрацыйна-экзаменацыйным аддзяленні ДАІ. Кіраваць імі можна, толькі маючы вадзіцельскае пасведчанне адпаведнай катэгорыі, страхавы поліс і адзнаку аб пройдзеным тэхнічным аглядзе. За невыкананне гэтых патрабаванняў прадугледжаная адміністрацыйная адказнасць.

Мэта аперацыі “Хуткасць” – папярэджанне дарожна-транспартных здарэнняў з-за перавышэння хуткасці. Кожны дзень супрацоўнікі ДАІ ствараюць рэйдавыя групы, якія сочаць за захаваннем вадзіцелямі хуткаснага рэжыму.

Размер штрафу за перавышэнне хуткасці – да 10 базавых велічынь (да 1 мільёна рублёў) у залежнасці ад хуткасці, з якой ехаў парушальнік.

Пры паўторным перавышэнні хуткасці на працягу года вадзіцеля могуць пазбавіць правоў кіравання тэрмінам да аднаго года альбо аштрафаваць на суму да 15 базавых велічынь (да 1 мільёна 500 тысяч рублёў).

Сяргей ЗЯНЬКО.