У Валожынскім раёне знайшлі абгарэлы труп са звязанымі нагамі

1 красавіка раніцай на абочыне дарогі Манькаўшчына – Кіявец знойдзены труп невядомага мужчыны. Цела памерлага абгарэлае, а ногі звязаныя вяроўкай.

Начальнік следчага камітэта Валожынскага раёна Віталь Юрэвіч паведаміў пра гэта ў інтэрв'ю "Рэгіянальнай газеце".

Па словах Віталя Юрэвіча, работнікі міліцыі і супрацоўнікі следчага камітэта папярэдне ўстанавілі асобу загінуўшага і затрымалі мужчыну, які падазраецца ў яго забойстве. Цяпер вядуцца следчыя дзеянні па ўстанаўленні сваякоў, знаёмых памерлага і магчымых сведкаў здарэння.

Падазроны змешчаны ў ізалятар часовага ўтрымання. Райаддзел следчага камітэта ўзбудзіў крымінальную справу па артыкуле "Забойства".