Вербаваў... праз інтэрнэт

Супрацоўнікамі ўпраўлення па барацьбе з арганізаванай злачыннасцю і карупцыяй Віцебскай вобласці спынена злачынная дзейнасць грамадзяніна Расійскай Федэрацыі, жыхара Маскоўскай вобласці, які, выкарыстоўваючы інтэрнэт, вербаваў жыхарак Віцебскай вобласці для "падпрацоўкі" ў якасці "дзяўчат па выкліку" ў Маскве і Падмаскоўі.

Паводле інфармацыі ўпраўлення ўнутраных спраў Віцебскага аблвыканкама, расіянін на адным з сайтаў у інтэрнэце стварыў асабістую старонку, на якую дзяўчаты высылалі свае анкеты. Вывучыўшы звесткі анкет, вярбоўшчык звязваўся з дзяўчатамі і прапаноўваў ім працаўладкаванне ў сферы аказання інтымных паслуг. Пры гэтым ён маляўніча апісваў ўмовы працы і абяцаў казачна высокія заробкі і гарантыю бяспекі...

У канцы студзеня на віцебскім чыгуначным вакзале быў затрыманы мужчына, які спрабаваў вывезці ў Маскоўскую вобласць дзвюх жыхарак Віцебска. Ім аказаўся 31-гадовы грамадзянін Расійскай Федэрацыі, генеральны дырэктар адной з будаўнічых арганізацый Маскоўскай вобласці. Затрыманаму "свеціць" пакаранне ў выглядзе пазбаўлення волі тэрмінам ад 7 да 10 гадоў з канфіскацыяй маёмасці. Праводзяцца мерапрыемствы па вызначэнні асоб жанчын, якіх спрабавалі завербаваць.

Варта адзначыць, што ў 2011 годзе супрацоўнікамі ўпраўлення па барацьбе з арганізаванай злачыннасцю і карупцыяй Віцебскай вобласці было спынена чатыры аналагічныя каналы, заведзены 24 крымінальныя справы па артыкулах Крымінальнага Кодэкса, якія маюць на ўвазе занятак прастытуцыяй, уцягненне ў занятак прастытуцыяй, вярбоўку з мэтай сэксуальнай эксплуатацыі.

Аляксандр ПУКШАНСКІ.